Kecha, 26-sentabr kuni, Venada Xalqaro atom energiyasi agentligi (XAEA) yillik Bosh konferensiyasining 66-sessiyasi ish boshladi.

Ushbu tadbirda tashkilotga a’zo 175 mamlakat qatorida O‘zbekiston Respublikasi vakillari ham ishtirok etmoqda.

O‘zbekiston delegatsiyasi Atom energetikasini rivojlantirish agentligi (O‘zAtom), fanlar akademiyasi va Sanoat havfsizligi davlat qo‘mitasi vakillaridan tarkib topgan.

Qayd etilishicha, bosh konferensiya agentlikning asosiy rahbarlik organi hisoblanadi. Konferensiya yakunida esa XAEA faoliyatining eng asosiy masalalari borasida tegishli qarorlar qabul qilinadi. Bosh konferensiya doirasida umumiy muzokaralar o‘tkaziladi va unda delegatsiya rahbarlari o‘zlarining dasturiy chiqishlari bilan ishtirok etadi.

Bosh konferensiya bilan bir qatorda XAEA doimiy ravishda yadro texnologiyalari va fanga bog‘liq bo‘lgan ilmiy forumlar o‘tkazadi va ularning barchasi Vena xalqaro markazida (VXM) bosh konferensiya bilan bir vaqtda bo‘lib o‘tadi.

Ta’kidlanishicha, O‘zbekiston delegatsiyasi XAEA konferensiyasining 66-sessiyasida tashkilot rahbarlari, boshqa mamlakatlar delegatsiyalari va atom energiyasidan tinchlik yo‘lida foydalanish bo‘yicha hamkorlikni amalga oshirish masalasida mas’ul bo‘lgan kompaniyalar bilan muzokaralar o‘tkazishni rejalashtirgan.

• Delegatsiya
• O'zAtom