Toshkent metropolitenidagi barcha bekatlarda yil oxiriga qadar kassalarning faoliyati tugatiladi. Bu haqda Toshkent metropoliteni DUK korxonasining matbuot xizmati xabar berdi.

“Bugungi kunda Toshkent metropoliteni yo‘lovchilariga qulaylik yaratish hamda kassa oldidagi tirbandliklarni kamaytirish maqsadida yo‘l haqini to‘lashning 10 dan ortiq turi mavjud bo‘lib, metroda to‘lov tizimini amalga oshirishda elektron turdagi to‘lov usullari yanada rivojlanib bormoqda. Shuningdek, metro xizmatidan kamdan kam foydalanuvchilar hamda shahrimiz mehmonlari uchun yanada qulaylik hosil qilish maqsadida ko‘plab bekatlarda chipta sotib olish uchun mo‘ljallangan avtomatlashtirilgan bankomatlar o‘rnatilmoqda.

Shu sababli, kassa operatori lavozimidagi xodimlariga bo‘lgan talab kamayib bormoqda. Shu munosabat bilan yopilgan kassalardagi operator lavozimi ish o‘rinlari bosqichma-bosqich qisqartirilmoqda. Jumladan, birinchi bosqich doirasida 204 ta kassa operatori lavozim shtatlari belgilangan normativ huquqiy hujjatlar asosida qisqartirildi.

Yuqorida ta’kidlangan avtomatlashtirilgan bankomatlarni metropolitenning barcha bekatlarida yil yakuniga qadar o‘rnatish rejalashtirilgan va buning natijasida, Toshkent metropolitenida kassa operatori va katta operator lavozimlariga bo‘lgan ehtiyoj qolmaydi hamda ushbu lavozimlar to‘liq tugatilishini ma’lum qilamiz.

Shuni inobatga olgan holda, “Toshkent metropoliteni” DUK ma’muriyati tomonidan faoliyat yuritayotgan operator xodimlar uchun yangi qo‘shimcha imkoniyatlar yaratish rejalashtirilmoqda. Xususan, xizmat lavozimi qisqartirilayotgan har bir xodimga, o‘z istak va imkoniyatlaridan kelib chiqib, kasb-hunar o‘rganish kurslarida ishtirok etish taklif qilinadi. Ular buxgalteriya, tikuvchilik, qandolatchilik va shu kabi boshqa yo‘nalishlardagi kurslardan birini tanlash imkoniyatiga ega bo‘ladilar.

Eng muhimi, ushbu o‘quv kurslarining to‘lovlari belgilangan tartibda “Toshkent metropoliteni” DUK tomonidan to‘liq qoplab beriladi.

Mazkur tashabbusdan ko‘zlangan asosiy maqsad — lavozimi qisqartirish jarayonida bo‘lgan xodimlarni qo‘llab-quvvatlash, ularga yangi kasb o‘rganish orqali barqaror daromad manbaini yaratishdir” - tashkilot bergan rasmiy axborotda.

• Ish
• Metro
• Metropoliten
• Toshkent