So‘nggi yillarda O‘zbekistonda tog‘-kon sanoatini rivojlantirish va sohani modernizatsiya qilish bo‘yicha keng ko‘lamli islohotlar amalga oshirilmoqda. Natijada to‘qqiz yil davomida tarmoqqa 10 milliard dollar miqdorida xorijiy investitsiya jalb qilindi.

Avval qimmatbaho va rangli metallarni qazib olish bilan asosan ikki yirik kombinat shug‘ullangan bo‘lsa, konlarni investorlarga berish bo‘yicha shaffof tizim joriy etilishi natijasida bugungi kunda sohada 65 ta xususiy korxona faoliyat yuritmoqda.

Statistik ma’lumotlarga ko‘ra, mustaqillikning dastlabki 25 yilida oltin qazib olish hajmi 63 tonnadan 87 tonnagacha oshgan bo‘lsa, so‘nggi to‘qqiz yilda yana 31 tonnaga ko‘payib, o‘tgan yili 118,4 tonnaga yetdi.

Shuningdek, 2016-yildan buyon kumush ishlab chiqarish 1,6 barobar, uran ishlab chiqarish 2,1 barobar, mis ishlab chiqarish esa 1,4 barobar oshdi. Natijada tog‘-kon sanoatida ishlab chiqarish hajmi 1,7 barobarga o‘sib, o‘tgan yil yakunida 270 trillion so‘mga yetdi.

Mutaxassislarning ta’kidlashicha, yuqori daromadli ish o‘rinlarining katta qismi aynan ushbu sohada yaratilgan. Hozirda ekskavator mashinistlari 30 million so‘mgacha, burg‘ilash mutaxassislari va yirik samosval haydovchilari 40 million so‘mgacha, geolog hamda marksheyderlar esa 70 million so‘mgacha oylik maosh olmoqda.

• Investitsiya
• Prezident
• sanoat
• tadbir