O‘zbekistonda 2025-yilning birinchi yarmida ishsizlik darajasi 0,4 foizga kamayib, umumiy 5,1 foizni tashkil etgan. Bu haqda Kambag‘allikni qisqartirish va bandlik vazirligi xabar berdi.

2025-yil iyul holatiga ko‘ra, mamlakat aholisining 15 million 377 ming nafari (41 foiz) iqtisodiy faol hisoblanadi. Shundan 14 million 595 ming nafari (94,9 foizi) iqtisodiyotning turli tarmoqlarida faoliyat yurityapti. 

Iyul oyida davlat korxona va tashkilotlarida 8 million 55 ming kishi (jami raqamdan 55,2 foizi) ishlashi qayd etilgan. Bu raqam 2024-yil iyuldagidan (6 million 768 ming kishi) 1 million 287 ming nafarga oshgan (19 foiz).

Xususiy sektorda ishlovchilar 4 million 760 ming (32,6 foiz) nafarni tashkil etib, o‘tgan yil mos davridagidan 750 ming kishiga kamaygan (13,6 foiz).

Joriy yil iyulda xorijda 1,9 million (12,2 foiz) nafar O‘zbekiston fuqarosi mehnat qilayotgani aniqlangan.

“Bugungi kunda respublika bo‘yicha 781 ming nafar ishga joylashishga muhtoj aholi mavjud (yil boshida 836,4 ming nafar edi)”, – deyiladi xabarda.

O‘zbekistonda so‘nggi uch yildagi ishsizlik darajalari quyidagicha bo‘lgan:

– 2023-yil 1-iyulda 8,1 foiz;

– 2024-yil 1-iyulda 5,8 foiz;

– 2025-yil 1-iyulda 5,1 foiz.

Vazirlik tahliliga ko‘ra, O‘zbekistonda iqtisodiy nofaol aholi 4 million 937 ming kishidan ortiq. Bu 2024-yil mos davriga nisbatan 38,4 ming kishiga (0,8 foiz) ko‘p.

• Bandlik
• O‘zbekiston
• ishsizlik
• statistika