Davlat xavfsizlik xizmati va Iqtisodiy jinoyatlarga qarshi kurashish departamenti xodimlari hamkorligida Jizzax shahrida o‘tkazilgan tezkor tadbirda 1993-yilda tug‘ilgan 2 nafar fuqaro tegishli hujjatlari bo‘lmagan 400 dona “Misoprostol” tabletkalari, 139 dona kapsulalar, 2 dona balzam va ularni qadoqlash uchun mo‘ljallangan 26 dona qutilarni 5 000 AQSh dollariga sotgan vaqtlarida ashyoviy dalillar bilan ushlangan.

Tezkor tadbir davomida Jizzax shahrida joylashgan ayollar fitness-klubi ham ko‘zdan kechirilib, u yerda qo‘lga olinganlar tomonidan tashkil qilingan yashirin sex aniqlangan. Mazkur sexda ushbu shaxslar turli xil dori vositalarini qo‘lbola usulda qadoqlash, taqsimlash va sotuvga tayyorlash bilan shug‘ullanib kelishgan.

Natijada, 1 dona qadoqlash uskunasi, sotuvga tayyorlangan jami 141 dona kapsulalar, 1 040 dona xitoy va ingliz tilida yozilgan soxta galogrammalar, 237 dona soxta shtrix kodlar, 1 014 dona bo‘sh kapsulalar, turli xildagi quti va paketlar protsessual tartibda rasmiylashtirilgan.

DXX Samarqand viloyati bo‘yicha boshqarmasi tomonidan boshqa huquqni muhofaza qiluvchi idoralar bilan hamkorlikda o‘tkazilgan tezkor tadbirda esa Samarqand shahrida yashovchi, 1998-yilda tug‘ilgan, farmatsevtika mahsulotlari chakana savdosi bilan shug‘ullanuvchi MChJ menejeri Qirg‘iz Respublikasidan aylanma yo‘llar orqali olib kelingan hamda tarkibida psixotrop moddalar mavjud bo‘lgan jami 9800 dona dori vositalarini shartli xaridorga 25 mln so‘mga sotgan vaqtida ushlangan. Bu haqda DXX matbuot xizmati xabar berdi.

Hozirda har ikki holat yuzasidan surishtiruv ishlari olib borilmoqda.

• DXX
• Dori
• Jizzax
• Qoidabuzarlik
• Samarqand