Joriy yilning 16-oktyabr kuni ijtimoiy tarmoqlarda Ohangaron tumanida voyaga yetmagan qizga nisbatan nomaqbul harakatlar sodir etilgani haqida xabar tarqalgan edi. Ijtimoiy himoya milliy agentligi bildirgan rasmiy munosabatga ko‘ra, mazkur holat yuzasidan huquqni muhofaza qiluvchi organlar tomonidan jinoyat ishi qo‘zg‘atilgan.

Toshkent viloyati Ichki ishlar bosh boshqarmasining ma’lumot berishicha, gumonlanuvchi shaxs protsessual tartibda ushlangan va unga nisbatan JKning 118- va 119-moddalarining 4-qismi bilan jinoyat ishi qo‘zg‘atilgan hamda “qamoq” ehtiyot chorasi qo‘llanilgan. Hozirda tergov harakatlari olib borilmoqda.

Ijtimoiy himoya milliy agentligi holatni o‘z nazoratiga olganligini hamda voyaga yetmagan jabrlanuvchi qizning huquqlari, psixologik va ijtimoiy himoyasini ta’minlash maqsadida “Inson” ijtimoiy xizmatlar markazining mutaxassislaridan iborat ishchi guruh tuzilganligini ma’lum qilgan.

• Jinoyat
• Mahkum
• Ohangaron