Prezidentning 2022-yil 27-apreldagi qarori bilan ipakchilik va qorakoʻlchilik sohasiga taqdim etilgan ayrim soliq imtiyozlari muddatlarini uzaytirish belgilandi.

Xususan, ipak qurti urugʻi, tut koʻchatlari va pilla yetishtirish, pillani qayta ishlash va tayyor mahsulotlar ishlab chiqarish bilan shugʻullanuvchi yuridik shaxslarni mol-mulk va yer soligʻidan ozod etish imtiyozi 2023-yil 1-yanvardan 2026-yil 1-yanvarga qadar uzaytiriladi.

Mazkur imtiyoz 2018-yil 4-dekabrdagi Prezident qarori bilan 2023-yil 1-yanvargacha taqdim etilgan edi.

Shuningdek, qorakoʻlchilik mahsulotlari ishlab chiqaruvchilari uchun yer soligʻi stavkasini 2018-yilda belgilangan miqdorda saqlab qolish muddati 2026-yil 1-yanvargacha uzaytiriladi.

Ushbu preferensiya 2018-yil 14-martdagi Prezident qarori bilan 2023-yil 1-yanvargacha belgilangan edi.

Qarorda mazkur oʻzgarishlardan kelib chiqib Soliq kodeksiga kiritiladigan oʻzgartirish va qoʻshimchalar boʻyicha qonun loyihasi Vazirlar Mahkamasi tomonidan Oliy Majlis Qonunchilik palatasiga kiritish belgilangan.

• Ipak
• Prezident
• Qaror
• Qorako‘lchilik