Kecha, 25-fevral kuni Qirg‘izistonning Issiqko‘l viloyati Oq-Suy tumanida 41 yoshli ayol 17 yoshar qizi homilador bo‘lib qolganini ko‘tarolmay, o‘zini yoqib yubordi. Bu haqda Issiqko‘l viloyati Ichki ishlar boshqarmasi ma’lum qildi.  

Ta’kidlanishicha, joriy yilning 25 fevral kuni Oq-Suy tumani IIBga 2009-yilda tug‘ilgan 17 yoshli qizning 16 haftalik homiladorligi haqida xabar kelib tushgan. Shundan so‘ng holat yuzasidan dastlabki tekshiruv ishlari boshlangan.

Surishtiruv doirasida tergov xizmati tomonidan 17 yoshli qiz so‘roqqa chaqirilgan. Voyaga yetmagan qizning onasi 41 yoshli M.A. bu holatni isnod sifatida qabul qilib, “Qizim homilador bo‘lib qoldi, endi odamlar ko‘ziga qanday qarayman?” deya qonuniy vakil sifatida tergov harakatlarida ishtirok etishdan bosh tortgan. Shu sababli so‘roq Oq-Suy tumanining Oila va bolalarni himoya qilish bo‘limi xodimi huzurida o‘tkazilgan.

Shundan so‘ng, o‘sha kuni taxminan soat 21:00 atrofida ona uyidan ichimlik sotib olishga ketayotganini aytib chiqqan va o‘ziga benzin sepib, yoqib yuborgan.

Ayol zudlik bilan Issiqko‘l viloyatining birlashgan shifoxonasiga yetkazilgan. Biroq  shunga qaramay, ayol olgan kuyish jarohatlari oqibatida vafot etgan.

Hozirda mazkur holat yuzasidan sud-tibbiy ekspertiza tayinlangan. Ayolning vafoti Oq-Suy tumani IIBda rasmiy qayd etilgan va sodir bo‘lgan holatni aniqlash uchun barcha zarur tergov harakatlari olib borilmoqda.

• IIB
• Qirg‘iziston