Keniya shimolidagi Moyale shahrida Global Face Human Resources rekruting agentligi asoschisi Festus Omvamba qo‘lga olindi. Politsiya ma’lumotlariga ko‘ra, ushbu tuzilma orqali Keniya fuqarolari Rossiyaga ishga joylashtirish niqobi ostida, aslida Ukrainadagi urushga yuborilgan.

Politsiya vakilining aytishicha, Omvamba Rossiyadan qaytganidan keyin qochishga uringan. Payshanba kuni u Nayrobiga olib kelinib, odam savdosi bilan shug‘ullanganlikda ayblangan. Ish aksilterror sudida ko‘rib chiqilmoqda. Tergov ma’lumotlariga ko‘ra, o‘tgan yili Omvamba tuzilmasi orqali Rossiyaga kamida 25 kishi yuborilgan.

Avvalroq Keniya hukumati urushda qatnashish uchun jami 1000 dan ortiq keniyalik jalb qilinganini ma’lum qilgandi. Rasmiy ma’lumotlarga ko‘ra, kamida 89 nafar keniyalik frontda qolmoqda, 39 nafari kasalxonalarda, 28 nafari bedarak yo‘qolganlar ro‘yxatida, yana bir esa qismi uyiga qaytgan. Kamida bir nafar keniyalik halok bo‘lgani tasdiqlangan.

• Keniya
• Rossiya
• Ukraina
• Urush