Ramazon ehsoni bahonasida o‘qituvchilardan pul yig‘ish topshirig‘ini bergan Jarqo‘rg‘on tumani hokimi o‘rinbosari Anvar Rajabov ishdan olindi. Bu haqda Surxondaryo viloyati hokimligi axborot xizmati rahbari Murodbek Davlatov xabar berdi.

Xabarga ko‘ra, Jarqo‘rg‘on tumanidagi 33-sonli umumta’lim maktabi pedagog xodimlaridan pul mablag‘i majburiy tartibda yig‘ilayotgani haqidagi xabar yuzasidan tayinlangan xizmat tekshiruvi yakunlangan. Tekshiruv viloyat hokimi nazoratida o‘tkazilib, holatlar kompleks tarzda o‘rganildi, hujjatlar tahlil qilindi va mas’ul shaxslarning tushuntirishlari olingan. Natijada Jarqo‘rg‘on tumani hokimining o‘rinbosari Anvar Rajabov tomonidan berilgan ko‘rsatma amaldagi qonunchilik talablariga zid ekani, xususan, ixtiyoriylik tamoyili buzilgani aniqlangan.

Xizmat tekshiruvi xulosasiga muvofiq Anvar Rajabov egallab turgan lavozimidan ozod etilib, uning harakatlariga huquqiy baho berish uchun tekshiruv materiallari belgilangan tartibda huquqni muhofaza qiluvchi organlarga yuborilgan.

• Iste'fo
• Mansabdor shaxs
• Surxondaryo