O‘zbekistonda koronavirusni zararsizlantiradigan noyob mahsulot – immun suti sotuvga chiqarildi. Bu haqda O‘zbekiston Oliy ta’lim, fan va innovatsiyalar vazirligi matbuot xizmati xabar berdi.

“Qoraqalpog‘iston poytaxti Nukus shahrida faoliyat yurituvchi “PanaevFarms” SARS-CoV-2'ni zararsizlantirish xususiyatiga ega bo‘lgan immun sut va sut mahsulotlarini ishlab chiqarish va sotishni yo‘lga qo‘ydi”,– deyiladi xabarda.

Koronavirusga qarshi immunitetli sut olish loyihasi ustida ish 2021-yilda Innovatsion rivojlanish vazirligi huzuridagi Xalqaro molekulyar allergologiya markazi va Vena tibbiyot universiteti tomonidan boshlangan edi. Tajriba tariqasida “PanayevFarms” tomonidan Avstriya va Germaniyadan keltirilgan nasldor sigirlar va golshtein sigirlariga O‘zbekiston-Xitoy ZF-UZ-VAC2001 vaksinasining 3 dozasi yuborildi.

2022-yilda ZF-UZ-VAC2001 rekombinant vaksinasi bilan emlangan sigirlarning immun sutidan olingan tahlil natijalari ikkinchi dozadan ikki hafta o‘tib neytrallashtiruvchi antikorlar ishlab chiqilganligini ko‘rsatdi.

2022-yil oktabr oyidan PanayevFarmsda Immune Milk savdo belgisi ostida pasterizatsiyalangan sutni kichik hajmda ishlab chiqarish texnologik liniyalarini sinovdan o‘tkazish boshlandi.

“Frontiers in Nutrition” nufuzli ilmiy jurnalida koronavirus infeksiyasiga qarshi immunitetli sutning yangi avlodi natijalari haqidagi ilmiy maqola chop etildi.

Mutaxassislarning fikricha, mahsulotni ishlab chiqarish, ayniqsa, JSST Eris omicron shtammining yangi varianti dunyoda tez tarqalishini e'lon qilgan sharoitda muhim ahamiyatga ega.

• koronavirus