Mamlakatimizda 2023-yilning 3-7-iyul kunlari O‘zbekiston Respublikasi Madaniyat va turizm vazirligi hamda O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyati tashabbusi bilan bir qator vazirlik va idoralar hamkorligida  “O‘zbekiston madaniy merosi – Yangi Renessans asosi” madaniy meros  haftaligi hamda “Yangi O‘zbekiston: taraqqiyot, innovatsiya va ma’rifat” mavzusidagi xalqaro hamkorlik  tashabbuslari haftaligi o‘tkaziladi.  Ushbu tadbirlarga dunyoning 60 ga yaqin mamlakatlaridan yuzlab mehmonlar tashrif buyurishi kutilmoqda.

Hafta davomida poytaxtimizdagi muzeylarda Temuriylar davri madaniy merosi, xalq amaliy san’ati durdonalari, O‘zbekistonda saqlanayotgan Avangard san’ati durdonalari ko‘rgazmalari o‘tkaziladi. Shuningdek, “Yangi O‘zbekiston – barqaror rivojlanish sari”, “Qulay biznes muhiti”, “Sog‘lom va bilimli jamiyat”, “Sifatli ta’lim va innovatsiyalar – barqaror kelajak asosi”, “Mintaqalarni bog‘lovchi ko‘prik”, “Inson qadri e’zozlanadigan diyor” singari mavzularda konferensiya va davra suhbatlari, uchrashuv va taqdimotlar o‘tkaziladi. 

Poytaxtimizda yaqinda barpo etilgan tadbirlar majmuasida mazkur haftaliklarning ochilish marosimi bo‘lib o‘tdi. Tadbirda tegishli vazirlik va idoralar, xalqaro va xorijiy tashkilotlar vakillari, madaniyat va san’at namoyandalari, jurnalist va blogerlar tashrif buyurishdi.

Marosim avvalida mamlakatimiz madaniy-ma’rifiy sohalardagi yangilanish jarayonlari haqidagi  videorolik namoyish qilindi. Marosimda so‘zga chiqqanlar mamlakatimizda so‘nggi  yillarda amalga oshirilayotgan bunyodkorlik ishlari, madaniyat va san’atni rivojlantirishga  qaratilayotgan ulkan e’tibor xususida to‘xtalib o‘tdilar.

“Bugun dunyo miqyosida mamlakatlar asosan iqtisodiy imkoniyatlari bilan emas, qadriyatlari, madaniyati bilan o‘zaro bellashyapti, - dedi O‘zbekiston Respublikasi Oliy Majlisi Senati raisining birinchi o‘rinbosari Sodiq Safoyev. – O‘zbekiston ham o‘zining  tashqi siyosatida birinchi navbatda madaniy salohiyatiga tayanadi. Shu orqali  yurtimiz bugun xalqaro miqyosda  o‘z imijini yaratmoqda. Bugun boshlanyotgan madaniy tadbirlar ham O‘zbekiston madaniyati va qadriyatlarini targ‘ib etishga qaratilgan”.

“Insoniyat uchun eng muhimi  bu muloqotdir, - dedi Oliy Majlis Qonunchilik palatasi spikerining birinchi o‘rinbosari Akmal Saidov. –  Yurtimizda xalqaro darajadagi  muloqotlarni ta’minlash maqsadida  davlat va nodavlat tashkilotlari tomonidan keng qamrovli  ishlar qilinmoqda. Xususan, O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyati bajayotgan ulkan ishlar haqida uzoq gapirish mumkin. Bugun ishga tushirilgan mazkur madaniyat maskani ham, bugundan boshlanadigan madaniy tadbirlar ham aynan turli davlatlar, xalqlar o‘rtasidagi madaniy muloqotni ta’minlaydi, deb umid qilaman”.

“Bugungi anjuman avvalo ijod ahlini, madaniyat va san’at vakillarini jamlamoqda, - dedi Madaniyat va turizm vaziri Ozodbek Nazarbekov. – Ayni paytda  xalqaro darajadagi hamkorlik aloqalarimiz rivojlanib bormoqda. Bunda san’atimiz vakillarining  ham munosib o‘rni bor. Bugun ochilayotgan haftalik ana shu hamkorlikni yanada mustahkamlashga, o‘zbek madaniyati va san’atini shuhratini yanada keng yoyishga xizmat qiladi”.

“Biz Yangi O‘zbekistonda milliy kino san’ati  rivojiga qaratilayotgan e’tibordan minnatdormiz, - dedi Kinematografiya agentligi direktori Firdavs Abduxoliqov. – Ayniqsa, xalqaro andozalarga mos ravishda, yangi ijodiy loyihalar taqdimotini o‘tkazishga mo‘ljallangan yangi bino – tadbirlar  majmuasi qurilib foydalanishga topshirilishi ana shu yuksak e’tiborning yorqin dalili bo‘la oladi”.

“Hamma narsani vaqt hal qiladi, deyishadi, - dedi O‘zbekiston xalq artisti Xayrulla Sa’diyev. – Bir paytlar bunday yirik san’at koshonalarini orzu qilishmiz mumkin edi, xolos. Bugun ana shu orzular amalga oshmoqda. Yurtimizda  barcha sohalar qatori, madaniy-ma’rifiy yo‘nalishda  ham keng qamrovli o‘zgarishlar amalga oshirilmoqda.  Vatanimiz kundan-kunga chiroy ochib, yangidan-yangi imoratlar, madaniy-ma’rifiy muassasalar bunyod etilmoqda. Keyingi yillarda O‘zbekiston bir qator xalqaro madaniy tadbirlarga mezbonlik qilmoqda. Xususan, maqom, baxshichilik, hunarmandchilik anjumanlari, Toshkent Xalqaro kinofestivali shular jumlasidan”.

“Uch yil avval xuddi shu yerda, “O‘zbekfilm” binosida o‘tgan bir  nufuzli  uchrashuvda  o‘zbek kinosining avvalgi shuhratini qayta tiklash masalasi ko‘tarilgan edi, - dedi O‘zbekistonda xizmat ko‘rsatgan artist, O‘zbekiston kino  arboblari uyushmasi raisi Matyoqub Matchonov. – O‘tgan qisqa fursat ichida o‘zbek kinosi yana jonlandi. O‘nlab yangi filmlarimiz dunyo yuzini ko‘rdi. O‘zbek kino ustalari yaratgan ko‘plab filmlar xalqaro miqyosda, nufuzli kino anjumanlarida e’tirof etilyapti. Bularning barchasi o‘zbek kinosiga qaratilayotgan ulkan e’tibor natijasidir. Biz kelgusida xalqimizning ishonchini yangi-yangi filmlarimiz, xalqaro darajadagi yutuq va muvaffaqiyatlarimiz bilan qaytarishga qo‘ldan kelguncha  harakat qilamiz”.

Tantanali marosim davomida bayram sayli, ko‘rgazmali  chiqishlar, dilrabo kuy-qo‘shiqlar, ko‘ngilochar tomoshalar ishtirokchilarni mamnun etdi.

• Madaniy meros
• Madaniyat