Toshkent shahrida Raqobatni rivojlantirish va iste’molchilar huquqlarini himoya qilish qo‘mitasi joylashgan bino elektron auksionga qo‘yildi. E-auksion platformasidagi ma’lumotlarga ko‘ra, 1956-yilda qurilgan to‘rt qavatli binoning boshlang‘ich bahosi 58,61 milliard so‘m etib belgilangan. Savdo joriy yilning 18-dekabr kuni start narxini oshirish tartibida o‘tkaziladi.

Bino Shayxontohur tumanidagi Labzak ko‘chasida joylashgan bo‘lib, umumiy maydoni 4075 metr kvadratni, egallagan yer maydoni esa 1050 metr kvadratni tashkil etadi. Auksion shartlariga ko‘ra, xaridor shaharsozlik hujjatlariga muvofiq hududda ofis yoki xizmat ko‘rsatish obyektlarini tashkil etishi kerak bo‘ladi.

Qo‘mitaga oldi-sotdi shartnomasi imzolangan sanadan boshlab, davlat organiga obyektni uch yil ichida bo‘shatish majburiyati yuklanadi. Agar qo‘mitaning Yangi Toshkentda qurilayotgan yangi ofis binosi rejadan avval bitkazilsa, ko‘chish muddati ham shunga mos ravishda oldinga surilishi mumkin.

Ma’lumot uchun, auksion savdo Vazirlar Mahkamasining 7-martdagi qarori asosida amalga oshirilayotgan davlat mulkini sotish dasturining bir qismi hisoblanadi. Unga muvofiq, qator vazirlik va idoralarning bino-inshootlari ham xususiy sektorga taklif etilmoqda. Ular orasida Qurilish va uy-joy kommunal xo‘jaligi vazirligi, Transport vazirligi va Avtomobil yo‘llari qo‘mitasiga qarashli obyektlar ham mavjud.

Davlat ijroiya organlarini Yangi Toshkent shahriga ko‘chirish tashabbusi avvalroq Prezident Shavkat Mirziyoyev tomonidan ilgari surilgandi. Unga ko‘ra, hozirdagi markaziy idora binolari o‘rnida mehmonxonalar, savdo va xizmat ko‘rsatish majmualari barpo etilishi rejalashtirilgan.

• Auksion
• Qo‘mita
• raqobat
• savdo