Vashingtonda qurollangan bir erkak AQSh Milliy gvardiyasi harbiylariga qarata o‘q uzdi. Xabarlarga ko‘ra, hodisa Oq uydan bir necha kvartal narida sodir bo‘lgan. Yaralangan harbiylar shifoxonaga yetkazilgan, ularning ikkalasi ham o‘ta og‘ir ahvoldaligi aytilmoqda.

Dastlab matbuotda harbiylarning halok bo‘lgani haqida xabarlar tarqaldi, bu haqda Virjiniya shtati gubernatori Patrik Morissi bayonot bergan edi. Biroq u ko‘p o‘tmay bu haqdagi postini ijtimoiy tarmoqlardan o‘chirib, “qarama-qarshi ma’lumotlar kelmoqda”, deb yozdi.

AQSh mudofaa vaziri Pit Hegsetning aytishicha, harbiylar shifoxonada va ularning ahvoli og‘ir.

AQSh prezidenti bu hujumni “terrorizm harakati” deb atadi.

Donald Trampning aytishicha, AQSh Ichki xavfsizlik vazirligi hujumchi 2021-yilda Afg‘onistondan Qo‘shma Shtatlarga kelganini tasdiqlagan.

“Bu butun xalqimizga qarshi sodir etilgan jinoyat, bu insoniyatga qarshi jinoyat. Biz Amerikani yana mutlaqo xavfsiz qilamiz”, — degan u.

Shuningdek, Tramp AQSh rasmiylari Jo Bayden ma’muriyati davrida Afg‘onistondan mamlakatga kirganlarning barchasini qayta tekshirishi kerakligini ta’kidlab o‘tgan.

Tergovga yaqin manbalarning ma’lum qilishicha, gumonlanuvchi Afg‘oniston fuqarosi Rahmonullo L. ekani aniqlangan. Federal qidiruv byurosi (FQB) uning barmoq izlari va boshqa ma’lumotlarini bazalar bilan solishtirib, 2021-yili Afg‘onistondan AQShga kelgani, avval Vashington shtatida yashagani va 2024-yilda siyosiy boshpana so‘rab ariza topshirganini bildirgan, boshpana 2025-yil boshida berilgani haqida ham xabarlar bor. Ichki xavfsizlik idoralari hozirda uning biografiyasi, aloqalari va ehtimoliy radikallashuvi bo‘yicha qo‘shimcha tekshiruvlar o‘tkazmoqda.

Hozirda hujum uyushtirgan erkakning o‘zi ham og‘ir yaralangan.

• AQSh
• Jarohatlar
• Milliy gvardiya
• Munosabat
• Oq uy
• Tramp
• hujum