Markaziy bankning “Pul-kredit siyosatining 2026-yil va 2027–2028-yillar davriga mo‘ljallangan asosiy yo‘nalishlar” konsepsiyasida ta’kidlanishicha, kelgusi yilda xorijdan O‘zbekistonga pul o‘tkazmalari 6–10 foizgacha o‘sishi kutilmoqda. O‘rta muddatli istiqbolda bu ko‘rsatkich 8–12 foiz atrofida shakllanishi mumkin.

Regulyatorning ma’lumot berishicha, bu o‘sishni ishchi muhojirlarni qabul qiluvchi davlatlar valyutalarining mustahkamlanishi, iqtisodiy faollikning o‘sishi va mehnat bozoridagi yuqori talab belgilab bermoqda.

Shuningdek, migratsiya yo‘nalishlarining kengayishi va geografik diversifikatsiya ham muhim omil sifatida qayd etilgan.

Ma’lumot uchun, 2025-yilning dastlabki to‘qqiz oyida mamlakatga pul o‘tkazmalari hajmi 24 foizga oshib, 13,9 mlrd AQSh dollariga yetgan. Bu 2023-yilga nisbatan 66 foizga yoki 5,5 mlrd dollarga ko‘pdir.

Pul o‘tkazmalari manbalarida Rossiya yetakchilik qilmoqda — jami mablag‘larning 78 foizi yoki 6,4 mlrd dollari ushbu mamlakat hissasiga to‘g‘ri keladi. Qolgan qism Qozog‘iston, AQSh, Janubiy Koreya, Turkiya, Buyuk Britaniya, Qirg‘iziston va Litva kabi davlatlar orqali yo‘naltirilgan.

Markaziy bank bu tendensiyani tashqi mehnat bozoridagi barqaror faollik va valyutalar bozoridagi musbat dinamika bilan izohlagan.

• Markaziy bank
• pul