Joriy yilning 1 yanvar holatiga ko‘ra, O‘zbekistonnnig davlat qarzi qoldig‘i 26,3 mlrd. AQSH dollarini tashkil etdi. Bu haqda Mоliya vazirligining 2021 yil uchun davlat qarzi holati va dinamikasi sharhida ma’lum qilingan.

Qayd etilishicha, davlat tashqi qarzi 23,6 mlrd., ichki qarzi esa 2,7 mlrd. dollar yoki yalpi ichki mahsulotga (YAIM) nisbatan 38 foizni tashkil etgan.

Davlat qarzining YAIMga nisbati 2021 yil boshida 39 foizdan 2022 yilning 1 yanvar holatiga 38 foizgacha pasaygan.

Shuningdek, davlat qarzi 2021 yil davomida 2,9 mlrd dollarga oshgan bo‘lsa-da, AQSH dollari hisobida yalpi ichki mahsulot tez sur’atlarda, ya’ni 9,4 mlrd dollarga o‘sgani tufayli davlat qarzining YAIMga nisbati pasaygan.

Xalqaro valyuta jamg‘armasining mamlakatlar iqtisodiyotiga bag‘ishlangan hisobotiga ko‘ra, O‘zbekistonning davlat qarzi bugungi kunda “moʻtadil” darajada.

Moliya vazirligi hisobotiga ko‘ra, umumiy davlat qarzi miqdorining o‘sishiga qaramay, makroiqtisodiy barqarorlik uchun xavfsiz darajada qolmoqda.

Qayd etish mumkin, 2022 yilda O‘zbekistonning umumiy davlat qarzi 33,5 mlrd. dollarga yetishi tahmin qilinmoqda.

• Moliya
• Tashqi qarz