Ma’lumki, Movarounnahrni yagona davlat sifatida birlashtirgan Sohibqiron Samarqandni poytaxt qilib, qudratli saltanat barpo qilgan. U dunyoga mashhur “Temur tuzuklari” orqali davlatni boshqarishning huquqiy asoslarini belgilagan, ilm-fan va madaniyat rivojiga beqiyos hissa qo‘shib, Ikkinchi uyg‘onish davri Temuriylar Renessansini boshlab bergan.

Uning davrida bunyod etilgan bebaho obidalar bugun o‘zbek xalqining milliy g‘ururi va o‘lmas tarixiy merosi sifatida xizmat qilmoqda. Sohibqironning “Adolat har bir ishda hamrohimiz va dasturimiz bo‘lsin” degan hikmatli so‘zlari esa bugungi kunda Yangi O‘zbekistonda olib borilayotgan islohotlarda yaqqol aks etmoqda.

Ushbu ulug‘ zot tavalludining 690 yilligini keng nishonlash maqsadida joriy yil 5-fevral kuni Prezident qarori qabul qilindi. Qarorga ko‘ra, har yili aprel oyida “Amir Temur oyligi” e’lon qilinadi va ta’lim muassasalari, ilmiy markazlar hamda mahallalarda olimlar, yozuvchi va san’atkorlar ishtirokida uchrashuvlar, davra suhbatlari va ma’rifiy tadbirlar o‘tkaziladi.

Qaror ijrosi doirasida dunyodagi mashhur muzeylarning ilg‘or tajribasi asosida Temuriylar tarixi davlat muzeyi binosi rekonstruksiya qilindi, zamonaviy jihozlar bilan ta’minlandi. Raqamlashtirish orqali imkoniyatlari kengaytirilib, ekspozitsiyalari yangilandi va xorijdagi to‘plamlardan xarid qilingan eksponatlar bilan boyitildi.

Muzeyning birinchi qavatida “Buyuk Sohibqiron – Ikkinchi Renessans asoschisi” bo‘limi tashkil etildi. Ikkinchi qavatda esa sun’iy intellekt va “aqlli” texnologiyalar asosida Amir Temur davri va Temuriylar tarixi bilan bog‘liq interaktiv ekspozitsiyalar joylashtirildi. Shu bilan birga, 3D formatdagi eksponatlar va xaritalar namoyish qilindi.

Prezident Shavkat Mirziyoyev muzeyning yangilangan ekspozitsiyasi va tashrif buyuruvchilar uchun yaratilgan sharoitlar bilan tanishar ekan, ajdodlar merosini o‘rganish, asrab-avaylash va targ‘ib etishning naqadar muhim ekaniga urg‘u berdi.

• Amir_Temur
• Shavkat Mirziyoyev