Rossiya qo‘shinlari uchun bugun, 6-yanvar kuni soat 12:00 dan boshlab Ukrainadagi barcha harakat chiziqlari bo‘ylab 36 soat davomida o‘t ochishni to‘xtatish rejimi joriy qilinadi.

Rossiya mudofaa vazirligi qo‘shinlarga bu ko‘rsatmani mamlakat prezidenti Vladimir Putin topshirig‘iga binoan Mudofaa vaziri Sergey Shoygu bergan.

“Prezident topshirig‘iga muvofiq, Rossiya Federasiyasi Mudofaa vaziri qo‘shinlarga 6-yanvar soat 12:00 dan 7-yanvar soat 24:00 gacha Ukrainadagi tomonlar o‘rtasidagi aloqa chizig‘i bo‘ylab 36 soatlik o‘t ochishni to‘xtatish rejimini joriy etish bo‘yicha topshiriq berdi”, – deyiladi Rossiya Mudofaa vazirligi bayonotida.

Qayd etilishicha, kecha 5-yanvar kuni Putin Shoyguga vaqtinchalik o‘t ochishni to‘xtatish haqida ko‘rsatma bergan.

“Pravoslav diniga e’tiqod qiluvchi ko‘p sonli fuqarolar jangovar hududlarda istiqomat qilayotganidan kelib chiqib, biz Ukraina tomonini o‘t ochishni to‘xtatishni e’lon qilishga va ularga Rojdestvo arafasida, shuningdek, Rojdestvo kunida marosimlarda qatnashishlariga ruxsat berishga chaqiramiz”, – deyiladi Putinning ko‘rsatmasida.

Shuningdek, Birlashgan Millatlar Tashkiloti Bosh kotibi Antoniu Guterrishning matbuot kotibi Rossiyaning pravoslav Rojdestvo bayramlarida Ukrainadagi barcha harbiy aloqa chizig‘i bo‘ylab o‘t ochishni to‘xtatish rejimini joriy qilgani tashkilot tomonidan olqishlanganini ma’lum qildi.

• Rossiya
• Ukraina
• Urush