Odatda qishda hayot toʻxtab qoladigandek tuyuladi: hech narsa uchun kuchingiz qolmaydi, uydan chiqishni xohlamaysiz va bu holat bahorgacha davom etishi mumkin. Yomon kayfiyat va mavsumiy stressdan xalos boʻlishga yordam beradigan juda oddiy usullar mavjud. Buning uchun harakatni hozirdan boshlashingiz mumkin. Qanday qilib deysizmi?

1. Stol uchun moʻljallangan chiroq sotib oling

Kuz va qish oylarida yomon kayfiyatning asosiy sababi yorugʻlikning yetishmasligidir. Biroq, oddiy stol chirogʻi bu muammoni hal qilishi mumkin. Tadqiqotlar shuni koʻrsatadiki, kuniga atigi 30 daqiqa yorugʻlik manbasi yonida oʻtirish holatingizni sezilarli darajada yaxshilash uchun yetarli boʻladi. Bundan tashqari, yorugʻlik manbasi yoniga joylanib olib, kitob oʻqishingiz yoki sharf toʻqishingiz mumkin.

2. Shirinliklar va tortlardan voz keching

Agar shirinliklar bilan oʻzingizni xursand qilishga odatlangan boʻlsangiz, ushbu zararli odatdan voz kechishingiz kerak: boisi kelajakda bir qancha tashvishni orttirib olasiz va tushkunlikni kuchaytirasiz. Yaxshisi, baxt gormoni – endorfin ishlab chiqarishni ragʻbatlantiradigan qora shokolad isteʼmol qiling.

3. Musiqa tinglang

Tadqiqotlarga koʻra, musiqa kayfiyatni sezilarli darajada yaxshilaydi va uning taʼsiri nafaqat kuyni tinglash paytida, balki ikki haftagacha davom etadi. Tinglayotgan musiqangiz quvnoq va ijobiy boʻlishi kerak.

4. Dam olishni rejalashtiring

Oʻzingizni baxtli his qilish uchun taʼtil haqida oʻylash kifoya. Taʼtilni oldindan rejalashtirish koʻngilni koʻtaradi.

5. Muloqot qilishdan qochmang

Qishda atrofdagilar bilan muloqot qilish istagi yoʻqoladi va koʻpincha uyda qolishni, sevimli telekoʻrsatuvlaringizni tomosha qilishni xohlaysiz. Ammo, olimlar buni qatʼiyan man qilishadi. Maʼlum boʻlishicha, yolgʻizlik nafaqat depressiv kayfiyatni kuchaytiradi, balki jismoniy salomatlikka ham zarar yetkazadi.

6. Boshqalarga yordam bering

Atrofda doimo yordamimizga muhtoj odamlar bor. Ezgu ishlar nafaqat muhtojlarga, balki ularni amalga oshirayotganlarga ham foyda keltiradi: gipertoniya kasalligiga chalinish xavfi kamayadi, stress darajasi pasayadi, haftada kamida bir marta yaxshilik qilishga odatlangan odamlar ancha baxtli va muvaffaqiyatli boʻlishadi.

• Foydali
• layfxak
• qiziqarli