Odam savdosi uchun Oʻzbekiston Interpol MMB tomonidan qidiruvga berilgan jinoyatchi Malayziyadan Oʻzbekistonga ekstraditsiya qilindi. Bu haqda IIV axborot xizmati xabar berdi.

Qayd etilishicha, Oʻzbekiston Respublikasi Ichki ishlar vazirligi hamda Interpol Milliy markaziy byurosi xodimlari tomonidan odam savdosida gumon qilingan ayol Kuala-Lumpurdan Toshkentga olib kelingan.

Ayol firibgarlik yoʻli bilan xorijda yaxshi maoshli ishga joylashtirib berishni vaʼda qilib, qizlarni Malayziyaga olib borib, oʻz sheriklari bilan jabrlanganlarning pasportlarini zoʻrlik bilan olib, fohishalik bilan shugʻullanishga majburlagan.

Gumonlanuvchi Interpolning Toshkent va Kuala-Lumpurdagi Milliy markaziy byurolari oʻrtasidagi hamkorlikdagi tadbirlar hamda tezkor-axborot koʻmagi, shuningdek, Oʻzbekistonning Malayziyadagi elchixonasi diplomatik missiyasining bevosita yordami natijasida qoʻlga olingan.

Kelishilgan harakatlar tufayli qidiruvdagi ayolni qoʻlga olish va Malayziya rasmiylari jinoyatchini Oʻzbekistonga ekstraditsiya qilish toʻgʻrisida qaror qabul qilmaguncha uni hibsda saqlash mumkin boʻlgan.

Maʼlum qilinishicha, Oʻzbekiston Respublikasi Bosh prokuraturasining ekstraditsiya toʻgʻrisidagi iltimosnomasi ijobiy koʻrib chiqilishi natijasida qidiruvda boʻlgan ayol sudda adolat qaror topishi uchun Toshkent shahriga yetkazib olib kelish maqsadida Oʻzbekiston huquq-tartibot idoralari xodimlariga topshirilgan.

• Ayollar
• Firibgarlik
• IIV
• Interpol