“O‘zbekiston elchixonasi ko‘magida Qozog‘istonning Olmaota shahrida odam savdosi qurboni bo‘lgan hamyurtimiz S.D. vatanga qaytarildi”, – deb xabar qilmoqda “Dunyo”axborot agentligi.

Bosh konsulxonadan olingan ma’lumotga ko‘ra, S.D. Qozog‘iston hududida og‘ir sharoitda qolgan va odam savdosidan aziyat chekkani uchun O‘zbekistonga qaytarishlarida yordam so‘rab ariza bilan murojaat qilgan.

O‘zbekiston diplomatlari va Qozog‘iston huquqni muhofaza qilish organlari hamkorligida olib borilgan tezkor harakatlar natijasida jabrlanuvchi nopok kimsalar qo‘lidan ozod qilinib, vaqtincha boshpana bilan ta’minlangan.

S.D. O‘zbekistonda 30-iyuldan 30-avgustgacha o‘tkazilayotgan “Vatanga qaytarish” insonparvarlik tadbirlari doirasida 11-avgust kuni Olmaota–Toshkent yo‘nalishidagi aviareysi orqali O‘zbekistonga kuzatib qo‘yilgan.

• Odam savdosi
• O‘zbekiston
• O‘zbekistonlik
• Qozog‘iston
• fuqaro