Rossiyaning Moskva viloyatidagi maktabda o‘ldirilgan Qobiljon Aliyevning onasi Nilufar Safoyevaga Tojikistonda uy berildi. “Asia-Plus”ga bu haqida marhumning qarindoshlaridan biri ma’lum qilgan.

Nashrning yozishicha, manba uy qanday tartibda va qachon berilgani borasida batafsil ma’lumot berishdan bosh tortgan. Qobiljonning qarindoshi Sherzod Alizoda “uy davlat nomidan taqdim etilgan”, – deya ma’lum qilgan, biroq qaysi davlat organi tomonidan berilganiga aniqlik kiritmagan. Shu bilan birga, xabardor manbaning nashrga aytishicha, kecha, 22-dekabr kuni ertalab bir nechta yuqori lavozimli mansabdor shaxslar Qobiljon Aliyevning xonadoniga tashrif buyurib, ta’ziya bildirgan. Ammo qaysi mansabdorlar borgani aniqlashtirilmagan.

 Qarindoshlar, shuningdek, oila hozirda mablag‘ yig‘ishga muhtoj emasligini ma’lum qilgan.

“Yordam ko‘rsatgan va yordam bermoqchi bo‘lgan barchaga minnatdorlik bildiramiz. Shu bilan birga, jamoatchilik bilishini istaymizki, hozir biz yordamga muhtoj emasmiz, Qobiljonning onasi nomiga ochilgan bank hisobi yopilgan. Shu sababli hech qanday bank hisob raqamlariga pul o‘tkazmaslikni so‘raymiz”, – deydi oilaning qarindoshlari.

• Rossiya
• Tojikiston
• Uy-joy