Fransiya prezidenti Emmanuel Makron AQSh prezidenti Donald Trampning Grenlandiyadagi vaziyat tufayli tariflarni joriy qilish tahdidini qabul qilib bo‘lmasligini e’lon qildi.

Tegishli post Fransiya rahbarining ijtimoiy tarmoqlardagi sahifasida joylashtirilgan.

Uning ta’kidlashicha, Parij Yevropada ham, undan tashqarida ham davlatlarning suvereniteti va mustaqilligi tamoyiliga sodiqdir.

“Biz aynan shu maqsadda Ukrainani qo‘llab-quvvatlaymiz va qo‘llab-quvvatlashda davom etamiz. Aynan shu sababli biz Daniya tomonidan Grenlandiyada tashkil etilgan mashqlarga qo‘shilishga qaror qildik. Biz bu qarorni qo‘llab-quvvatlaymiz. Bu, shuningdek, Arktikada va Yevropamiz chegaralarida xavfsizlik xavf ostida bo‘lgani uchundir.

Biz shunga o‘xshash vaziyatlarga duch kelganimizda, Ukrainada, Grenlandiyada yoki dunyoning boshqa biron bir joyida hech qanday qo‘rqitish yoki tahdidlar bizga ta’sir qilmaydi.

Bu kontekstda tariflar tahdidlari qabul qilib bo‘lmaydi. Agar ular tasdiqlansa, yevropaliklar birlashgan va muvofiqlashtirilgan tarzda javob berishadi. Biz Yevropa suverenitetiga hurmatni ta’minlaymiz”, – deya ta’kidlagan Makron.

Fransiya rahbari bu masala bo‘yicha yevropalik sheriklar bilan muzokaralar olib borish niyatida.

Avvalroq Tramp sakkizta Yevropa mamlakati tovarlari uchun 10 foizlik boj tariflarni e’lon qilgandi.

• AQSh
• Fransiya
• Makron
• Tramp