OpenAI kompaniyasi ChatGPT chatbotining bepul versiyasi va Go modeliga reklama kiritilishini e’lon qildi. Bu haqda OpenAI rasmiy veb-saytida ma’lum qilindi.

Bayonotda reklama integratsiyalarini sinash yaqin kunlarda boshlanishi aytilgan. Ta’kidlanishicha, reklama chatbot javoblariga ta’sir ko‘rsatmaydi va har doim aniq belgilanadi.

“Yaqin kunlarda biz AQShda bepul tariflar, ChatGPT va Go uchun reklamalarni sinovdan o‘tkazishni boshlashni rejalashtirmoqdamiz. Bu ko‘proq odamlarga bizning vositalarimizdan kamroq cheklovlar bilan yoki butunlay bepul foydalanish imkonini beradi. Plus, Pro, Business va Enterprise obunalariga reklama kiritilmaydi”, – deya ta’kidlanadi kompaniya xabarida.

​Shuningdek, OpenAI foydalanuvchilarning ChatGPT bilan yozishmalarini va ularning ma’lumotlarini reklama beruvchilarga sotmaslikka va’da bergan. Bundan tashqari, foydalanuvchilar istalgan paytda shaxsiylashtirishni o‘chirib qo‘yishlari va reklama uchun foydalaniladigan ma’lumotlarni tozalashlari mumkin.

“Odamlar ChatGPT’ga ko‘plab muhim va shaxsiy vazifalarni hal qilishni ishonib topshiradi. Shu sababli ular reklama kiritishda “ChatGPT’ni qadrli qiladigan xususiyatlarni saqlab qolish”ni juda muhim deb hisoblashadi”, – deydi ishlab chiquvchilar.

• ChatGPT
• reklama