Bugun, 14-mart kuni Qozog‘iston Respublikasi Parlamenti Majilisining yalpi majlisi bo‘lib o‘tmoqda. Unda mamlakat Bosh prokuraturasining Jana Qozog‘iston deputatlik guruhining yanvar oyida sodir bo‘lgan voqealarni tergov qilish bo‘yicha so‘roviga javobini o‘qib eshittirdi.

Bosh prokuror Berik Asilovga ko‘ra, Qozog‘istonda yanvar oyidagi tartibsizliklar natijasida 230 kishi halok bo‘lgan, 3,5 ming xavfsizlik xodimi yaralangan.

Halok bo‘lganlarning 19 nafari huquq-tartibot xodimlari bo‘lgan.

Bosh prokuror o‘z hisobotida, shuningdek, Olmaotada halok bo‘lgan 53 kishining o‘limi sabablari o‘rganilayotganini ham aytib o‘tdi. Ular shahar hududidan turli tan jarohatlari, jumladan, 48 nafari o‘q, 2 nafari pichoq, 3 nafari boshqa tan jarohatlari va kuyish jarohatlari bilan topilgan. Qolgan yetti viloyatda 63 nafar hujumchi huquq-tartibot kuchlari tomonidan hokimliklar, militsiya va Qozog‘iston MXQ binolarini himoya qilish chog‘ida yo‘q qilingan.

Shuningdek, “yanvar fojiasi”da turli muassasalarning 1500 ta binosi shikastlangan. Umumiy zarar esa 100 milliard tengeni tashkil etadi.

Bundan tashqari, 2 800 dan ortiq qurol va o‘q-dorilar o‘g‘irlangan, moliyaviy tashkilotlar talon-taroj qilingan. 1 700 nafar fuqaro va tadbirkorlik subyekti jabr ko‘rgan. Ayni paytda o‘g‘irlangan qurollarni qaytarish uchun barcha choralar ko‘rilmoqda.

“O‘z ixtiyori bilan qurol topshirgan shaxslar javobgarlikka tortilmaydilar”, – deydi IIV vaziri Marat Axmetjanov.

Berik Asilov tartibsizliklarda ekstremizm, jinoyatchilik va diniy radikalizm qo‘shilib ketganini taʼkidlaydi.

“Qo‘lga olinganlar orasida destruktiv diniy oqimlar va ekstremistik tashkilotlarning o‘nlab tarafdorlari bor. Ekstremistlar butun mamlakat bo‘ylab davlat idoralari va huquq-tartibot idoralari binolarini egallab olishdi.

Yanvar voqealaridan keyin 3 770 ta jinoyat ishi qo‘zg‘atilgan”, – deydi Asilov.

Shuningdek, hisobotda Qozog‘iston MXQ davlatga xiyonat va hokimiyatni egallab olishga urinish bo‘yicha 15 ta ish ochgani maʼlum qilindi.

 “Ushbu ishlar bo‘yicha sobiq qo‘mita rahbari Masimov va uning 3 nafar o‘rinbosari sud sanksiyasi bilan hibsga olindi. Ushbu organning yana ikki rahbari mansab vakolatini suiisteʼmol qilganlikda gumon qilinib, javobgarlikka tortilmoqda. Tergov siri va aybsizlik prezumpsiyasini hisobga olgan holda, hozirda tergovning barcha tafsilotlarini oshkor etib bo‘lmaydi”, – deydi Qozog‘iston Respublikasi Bosh prokurori. 

• Bosh prokuratura
• Namoyish
• Qozog‘iston