Korrupsiyaga qarshi kurashish agentligiga kelib tushgan murojaatga asosan o‘tkazilgan o‘rganishda “Kogon yog‘ ekstraksiya zavodi” aksiyadorlik jamiyatining sobiq mansabdor shaxslari tomonidan mansab vakolatlari suiiste’mol qilingani, soxta hujjatlar tayyorlash orqali jamiyat va davlat manfaatlariga juda ko‘p miqdorda moddiy zarar yetkazilgani aniqlandi.

Ma’lum bo‘lishicha, 2021–2022-yillarda aksiyadorlik jamiyati tomonidan “O‘zsanoatqurilish bank” aksiyadorlik tijorat banki “To‘qimachilik” bank xizmatlari markazi”dan aylanma mablag‘larini to‘ldirish maqsadida 30,5 milliard so‘m kredit olingan.

Kredit ta’minoti sifatida aksiyadorlik jamiyatiga tegishli umumiy maydoni 150.134 kv.m. bo‘lgan ma’muriy va ishlab chiqarish bino-inshootlari 50 milliard so‘mga baholanib, garovga qo‘yilgan.  

Mansabdor shaxslar oldindan o‘zaro til biriktirib, ushbu  kredit mablag‘larini olish yuzasidan hujjatlarni rasmiylashtirish jarayonida belgilangan tartibda jamiyatning kuzatuv kengashi a’zolarining roziligini olmasdan, rasmiy hujjatlarga yolg‘on va soxta ma’lumotlar kiritib, bankka taqdim etib kelgan.  

Kredit mablag‘lari samarasiz ishlatilgani tufayli aksiyadorlik jamiyati va bank tizimiga 19,6 milliard so‘mga yaqin zarar yetkazilgan.

Agentlik axborot xizmatidan ma’lum qilishlaricha, qayd etilgan holatlar bo‘yicha aksiyadorlik jamiyatining mansabdor shaxslariga nisbatan Jinoyat kodeksining tegishli moddalari bilan jinoyat ishi qo‘zg‘atilgan.

Ayni paytda dastlabki tergov harakatlari olib borilmoqda.

• Bank
• Firibgarlik
• Kredit