Bugun, 8-mart kuni “Vagner” guruhi asoschisi Yevgeniy Prigojin xalqaro darajada tan olinmagan Donetsk Xalq Respublikasidagi Baxmut (Artyomovsk) shahrining butun sharqiy qismi Rossiya nazorati ostiga o‘tganini e’lon qildi.

Avvalroq, “Vagner” asoschisi guruh jangchilari Artyomovskni amalda o‘rab olgani haqida ma’lum qilgandi.

"Vagner PMC bo'linmalari Artyomovsk (Baxmut)ning butun sharqiy qismini egallab oldi. Baxmutka daryosining sharqidagi hamma narsa to'liq Vagner PMC nazorati ostida", – deyiladi Prigojin o'z matbuot xizmatining telegram-kanaliga joylagan audiosida.

Baxmut (Artyomovsk) DXRning Kiyev nazoratidagi qismida, yirik Gorlovka shahridan shimolda joylashgan va Donbassdagi Ukraina qo'shinlari guruhini ta'minlash uchun muhim transport markazidir.

Ma’lumot uchun, “Vagner” bu rossiyalik tadbirkor Yevgeniy Prigojin tomonidan tashkil etilgan va boshqariladigan noaniq huquqiy maqomga ega Rossiyaning nodavlat qurolli tuzilmasi (xususiy harbiy kompaniya, PMC).

• Rossiya
• Ukraina