Rossiya 36 mamlakat aviakompaniyalariga parvozlarni taqiqladi. Bu haqda Rosaviatsiya xabar berdi. 

Qayd etilishicha, cheklovlar xalqaro qonunlarga rioya qilish maqsadida va Rossiya aviatsiya sanoatiga qarshi sanksiyalarga javob sifatida kiritilgan.

Shu jumladan, Rossiya havo hududi Yevropa Ittifoqi mamlakatlari, jumladan Avstriya, Bolgariya, Germaniya, Gretsiya, Ispaniya, Italiya, shuningdek, Buyuk Britaniya va Kanada uchun yopiq.

“Ushbu mamlakatlardan parvozlar Federal havo transporti agentligi yoki Rossiya tashqi ishlar vazirligi tomonidan berilgan maxsus ruxsatnoma bilan amalga oshirilishi mumkin”, – deyiladi havo transporti agentligi xabarida.

Qayd etish mumkin, Rossiyaning Ukrainadagi operatsiyasi boshlanganidan so‘ng bir qancha davlatlar o‘z havo hududini Rossiya samolyotlari uchun yopdi. Xususan, buni Buyuk Britaniya, Kanada, 27-fevralda esa butun Yevropa Ittifoqi amalga oshirdi. Rosaviatsiya bu harakatlarni do‘stlik sifatida baholamadi.
 

• Rossiya
• Yevroittifoq
• aviatsiya