Ukrainadagi urushning yetmish birinchi kuni yakunlandi. Mariupolda rus qoʻshinlarining Azovstalga hujumi davom etmoqda. Ukraina harbiylari Xarkov va Izyum yoʻnalishlarida qarshi hujumni boshlaganiga qaramay, Rossiya armiyasi Xarkovning turar-joy hududlariga zarba berishda davom etmoqda.

Ushbu maqolada Rossiya Ukraina oʻrtasida kechayotgan urushning yetmish birinchi kuni asosiy voqealari va fotosuratlarini toʻpladik.

Ukraina Qurolli Kuchlari Bosh shtabining maʼlumotlariga koʻra, Rossiya armiyasi Donetsk va Lugansk hududini egallab olish va Qrimga quruqlikdagi yoʻlni saqlab qolish maqsadida hujum amaliyotlarini toʻxtatmayapti. Shuningdek, Rossiya armiyasi alohida yoʻnalishlar boʻyicha qoʻshinlarni toʻplab, zaxiralarni toʻldirmoqda va oʻz boʻlinmalarining taktik holatini yaxshilashga harakat qilmoqda.

Maʼlumotlarga koʻra, Azov bataloni jangchilarining taʼkidlashicha, 5-may kuni rus qoʻshinlari samolyot, artilleriya va piyoda qoʻshinlar yordamida zavodga qarshi yangi hujum boshlagan. Mariupolda Rossiya kuchlari Azovstalda jamlangan. Ular hududni egallab olish hamda Ukraina boʻlinmalarini yoʻq qilish uchun havodan qoʻllab-quvvatlanadigan hujumlarni davom ettirmoqda.

Rossiya Mudofaa vazirligining maxsus vakili Igor Konashenkovning tungi brifingida eʼlon qilingan maʼlumotlari (eslatib oʻtamiz, urush davrida eʼlon qilingan maʼlumotlarni mustaqil manbalar orqali tekshirishning imkoni yoʻq):

Rossiya HKKning yuqori aniqlikdagi raketalari bilan havodan turib oʻq-dori ombori, shuningdek jonli kuchlar va harbiy texnikaning 31 ta nuqtasiga zarba berilgan.

Rossiya HKKning tezkor-taktik va armiya aviatsiyasi kun davomida Ukrainaning 27 ta harbiy obʼyektlariga zarba bergan. 7 ta rota tayanch punktlari, 3 ta oʻq-dori ombori, 16 ta jonli kuchlar va harbiy texnika nuqtalari oʻqqa tutilgan. Shaxsiy tarkibning 310 nafarga yaqin askarlari, 27 ta harbiy texnika, “Osa-AKM” ZRK yoʻq qilingan.

Raketa qoʻshinlari va artilleriya tomonidan 22 ta boshqaruv punkti, 207 tayanch punktlari, uchta oʻq-dori omboriga zarba berilgan.

Havo hujumidan mudofaa vositalari bilan Su-27 samolyoti va 7 ta pilotsiz uchar qurilmalar urib tushirilgan.

Maxsus harbiy operatsiya boshidan buyon: 152 ta samolyot, 112 ta vertolyot, 749 ta pilotsiz uchar qurilma, 291 ta zenit raketa komplekslari, 2846 ta tank va boshqa zirhli jangovar mashinalar, 331 ta birvarakayiga oʻt ochish reaktiv tizimlari, 1345 ta dala artilleriyasi qurollari va minomyotlar, shuningdek, 2698 ta harbiy avtomobil texnikasi yoʻq qilingan.

Urushni oʻrganish boʻyicha Amerika instituti tahlilchilarining fikriga koʻra, Ukraina qoʻshinlari Rossiyaning Ukraina sharqidagi hujum harakatlarini toʻxtatib qoʻygan. Chorshanba kuni rus armiyasi hujumga oʻtgan. Biroq bu hujum muvaffaqiyatsizlikka uchrab, oldinga siljishning imkoni boʻlmagan. Mutaxassislarning fikricha, Rossiya Federatsiyasining Izyum yaqinidagi birlashmasi Rubijne yaqinida Ukraina qoʻshinlarini oʻrab olishi dargumon.

• Rossiya
• Ukraina
• Urush