Rossiya va Ukraina o‘rtasida asir harbiy xizmatchilar almashinuvi bo‘lib o‘tdi. Bu haqda Rossiya Mudofaa vazirligi xabar berdi.

Unga ko‘ra, tomonlar 100 nafar rossiyalik harbiyni 100 nafar ukrainlarga almashishgan.

Xabar berilishicha, Rossiya harbiylari muzokaralar jarayoni natijasida 8-fevral kuni Kiyev nazorati ostidagi hududdan qaytgan. Rossiya havo-kosmik kuchlarining samolyotlari ozod qilingan jangchilarni Moskvaga olib borgan, u yerda ular davolanadi va reabilitatsiya qilinadi. Harbiy xizmatchilarga zarur psixologik yordam ham ko‘rsatilayotgani aytilmoqda.

Mudofaa vazirligi, shuningdek, Birlashgan Arab Amirliklari almashinuv jarayonida vositachilik qilganini ta’kidlagan.

Moskva va Kiyev o‘rtasida harbiy asirlarning oldingi almashinuvi 31-yanvar kuni bo‘lib o‘tgan edi. Unda 195 kishi Rossiyaga qaytib kelgan. Xuddi shu miqdordagi mahbuslar Ukrainaga topshirilgan edi.

• Rossiya
• Ukraina