“Netflix” “Sevgi, o‘lim va robotlar” antologiyasining uchinchi qismi treylerini namoyish etdi.

Qayd etilishicha, videoda to‘qqiz qismning har biri uchun vizual uslub, sarlavhalar va syujet yoki vaziyatning qisqacha tavsifi ochib berilgan.

Birinchi ikki faslda bo‘lgani kabi, seriyalar bir-biriga bog‘liq emas va mustaqil asarlar – birinchi qismdagi qahramonlarning yangi sarguzashtlari haqida hikoya qiluvchi “Uch robot: Chiqish strategiyalari” epizodi bundan mustasno.

Ta’kidlanishicha, yangi mavsum premyerasi bugun, 20 may kuni “Netflix”da bo‘lib o‘tadi.

“Sevgi, o‘lim va robotlar” bu “Netflix” striming xizmati tomonidan buyurtma qilingan va kattalar auditoriyasiga mo‘ljallangan Amerika animasion serial-antologiyadir. 18 qismdan iborat birinchi mavsum 2019 yil 15 martda ilk bor premyera qilingan.

Serialning ijrochi prodyuseri Devid Fincher, Tim Miller, Joshua Donen va Jennifer Miller hisoblanadi. Har bir epizod butun dunyo bo‘ylab turli jamoalar va studiyalar tomonidan yaratilgan. Seriya 10 yildan ortiq ishlab chiqilgan. 

Serial g‘oyasi Fincher va Miller “Heavy Metal” jurnalidagi komikslar va hikoyalardan ilhomlanganidan so‘ng paydo bo‘lgan.

Avvalroq, kompaniya “Qora oyna” serial-antologiyasining davomi ustida ishlayotgani haqida xabar bergan edik.

Qayd etish mumkin, shou yanada kattaroq va uzunroq bo‘ladi. Yangi mavsumda avvalgidek uch emas, balki ko‘proq epizod bo‘ladi hamda ularning har biri alohida filmga o‘xshaydi.
Biroq premyera sanasi, syujet tafsilotlari va aktyorlar tarkibi haqida batafsil ma’lumot berilmagan.

• Netflix