7-oktyabr kuni Toshkent metropolitenining “Shahriston” bekatida 1985-yilda ishlab chiqarilgan metro poyezdida texnik nosozlik yuz berdi. Poyezd nosozlik sabab 6 daqiqaga to‘xtab qoldi. Bu haqda “Toshkent metropoliteni” AJ xabar berdi.

Qayd etilishicha, soat 08:22 da 69-sonli harakat tarkibida texnik nosozlik kuzatilgan. Shundan so‘ng yo‘lovchilar poyezddan tushirilgan va harakat tarkibi texnik ko‘rikdan o‘tkazish uchun maxsus yo‘lakka olib ketilgan.

Yo‘lovchilarga xizmat ko‘rsatishda uzilishlarning oldini olish maqsadida zaxira poyezd zudlik bilan yo‘nalishga chiqarilgan.

“Toshkent metropoliteni” AJ ma’lumotiga ko‘ra, nosozlik yuzasidan tegishli texnik choralar ko‘rilgan. Korxona yuzaga kelgan noqulaylik uchun yo‘lovchilardan uzr so‘ragan.