Oʻzbekiston Respublikasi Prezidenti Shavkat Mirziyoyev 2 dekabr kuni Birlashgan Arab Amirliklari Vise-prezidenti, Bosh vaziri, Dubay Amirligi hokimi Muhammad bin Roshid ol Maktum bilan telefon orqali soʻzlashdi. Bu haqda Prezident matbuot xizmati xabar berdi.

Qayd etilishicha, suhbat avvalida Oʻzbekiston yetakchisi Amirliklar Vise-prezidentini qutlugʻ bayram — ushbu mamlakat tashkil topganining 50 yilligi bilan muborakbod etib, farovonlik, barqaror taraqqiyot va ravnaq tilaklarini izhor etgan.

BAA ijtimoiy-iqtisodiy, innovatsion va gumanitar taraqqiyotning barcha soha va yoʻnalishlarida katta yutuqlarga erishayotgani, mamlakatning xalqaro maydondagi nufuzi ortib borayotgani alohida taʼkidlangan. Bularning barchasi Dubayda muvaffaqiyatli oʻtkazilayotgan EXPO butunjahon koʻrgazmasi tadbirlarida ham oʻz tasdigʻini topmoqda.

Oʻzbekiston Prezidenti va Amirliklar Vise-prezidenti har doimgidek yaqin va doʻstona ikki tomonlama aloqalarni yanada mustahkamlash hamda koʻp qirrali sheriklikni, eng avvalo, savdo-iqtisodiy va investitsiya sohalarida kengaytirish uchun keng imkoniyatlar mavjud ekanini qayd etdilar.

Yuqori texnologiyalar va innovatsiyalar, “yashil” energetika, savdo va logistika, shuningdek, intellektual salohiyatni roʻyobga chiqarish sohalarida istiqbolli qoʻshma loyihalarni ilgari surishga alohida eʼtibor qaratilgan.

Faol muloqotni va barcha yoʻnalishlarda keng koʻlamli hamkorlikni davom ettirish yuzasidan kelishuvga erishilgan.

Keltirilishicha, telefon orqali muloqot ochiq, doʻstona va ishonchli ruhda oʻtdi.

• Mirziyoyev
• Prezident
• Universitet