Shimoliy Koreyada “Kalmar oʻyini” serialini noqonuniy yoʻl bilan sotib olgan yetti nafar oʻquvchi qamoqqa olindi. Serialni qonunga xilof ravishda mamlakat hududiga olib kirgan va uni maktab oʻquvchilariga sotgan savdogar esa oʻlim jazosiga hukm qilingan.

Maʼlumotlarga koʻra, erkak fleshkaga yozilgan “Kalmar oʻyini” serialini boshqalarga ham tarqatgan.

Huquq-tartibot idoralari xodimlari tomonidan qoʻlga olingan maktab oʻquvchilari serialni kimdan olganlarini oshkor qilishgan. Serial yozilgan fleshkani sotib olgan oʻquvchiga butun umrlik qamoq jazosi berilgan boʻlsa, qolgan oʻquvchilarning har biri 5 yilga “kesilgan”. Serialni sotgan fuqaro esa qatl qilingan.

Eslatib oʻtamiz, 2021-yildan boshlab Shimoliy Koreya hukumati tomonidan Gʻarb mamlakatlari va Janubiy Koreyadan mamlakat hududiga filmlar, shou hamda seriallarni olib kirish taqiqlangan. Sanab oʻtilgan videomateriallarni tomosha qilish, saqlash va tarqatish uchun oʻlim jazosi belgilangan.

• Kino