Toshkent viloyati Zangiota tumanida Sirdaryo viloyati prokurorining katta yordamchisi 50 dona “Zardeks” kuchli ta’sir qiluvchi dori vositasi bilan qo‘lga tushgan. Bu haqda Davlat xavfsizlik xizmati xabar bermoqda.

Qayd etilishicha, huquqni muhofaza qiluvchi organlar tomonidan Toshkent viloyati Zangiota tumani hududida o‘tkazilgan tezkor tadbirda Sirdaryo viloyati prokurorining katta yordamchisi boshqaruvida bo‘lgan Spark rusumli avtomashina to‘xtatilib, ko‘zdan kechirilgan va avtomashina salonida 50 dona “Zardeks” kuchli ta’sir qiluvchi dori vositasi borligi aniqlanib, protsessual tartibda rasmiylashtirib olingan.

Shuningdek, tezkor tadbir davom ettirilib, unga mazkur dori vositalarini sotgan Samarqand viloyatining Bulung‘ur tumanida istiqomat qiluvchi, 1997-yilda tug‘ilgan fuqaro Toshkent shahrida qo‘lga olingan va undan ham 300 dona “Zardeks” kuchli ta’sir qiluvchi dori vositasi ashyoviy dalil sifatida olingan.

Ma’lum bo‘lishicha, ushbu kuchli ta’sir qiluvchi dori vositalari Qirg‘iz Respublikasidan noqonuniy yo‘llar bilan olib kelingan. Hozirda holat yuzasidan tergovga qadar tekshiruv harakatlari olib borilmoqda.

• DXX
• Jamoat xavfsizligi
• Sirdaryo
• Toshkent viloyati
• Zangiota