Xabaringiz bor, Parij Olimpiadasida o‘zbekistonlik Sitora Turdibekova Xalqaro boks assotsiatsiyasi tekshiruvlariga ko‘ra erkak deb topilgan xitoy taypeyilik Lin Yuy-Tinga qarshi jang qilib, mag‘lubiyatga uchragandi.

Xalqaro boks assotsiatsiyasi (IBA) prezidenti Umar Kremlev o‘zining Instagram sahifasida mazkur holatni Xalqaro Olimpiya qo‘mitasi uchun sharmandalik ekanligini bildirib, erkak bokschilarga qarshi ringga ko‘tarilgan ayol bokschilar IBA tomonidan 100 ming AQSh dollari bilan taqdirlanishini aytdi.

“IBA Olimpiadada adolatsizlikka uchragan bokschi qizlarni oltin medalni qo‘lga kiritgan sportchilarga beriladigan pul mablag‘lari miqdorida mukofotlaydi.

Biz barchani himoya qilamiz va, albatta, gender diskriminatsiyasini ham. Hozir Olimpiya o‘yinlarida sodir bo‘layotgan voqealar barcha zamonlarning eng sharmandali holati.

Sportchilar XOQ rahbariyatining beadabligidan jabr ko‘rmoqda va sportchilar gender diskriminatsiyasi hamda sog‘lom raqobatning yo‘qligi tufayli faoliyatini yakunlaydi.

Biz sportchilarimizni qo‘llab-quvvatlashda davom etamiz va boshqa xalqaro assotsiatsiyalar ham jim turishni to‘xtatib, bizdan o‘rnak olish vaqti keldi!” – deb ta’kidlagan Kremlev o‘z sahifasida.

Qayd etish joizki, Turdibekovadan tashqari italiyalik Anjela Karini ham raqibi genetik tekshiruvda erkak kishi ekanligini aniqlangan jazoirlik Iman Xelifga qarshi jangning 46-soniyasida to‘qnashuvni davom ettirishdan bosh tortgandi.

• Boks
• Olimpiada