Endi Suriyada Rossiya, Eron va Isroildan tovarlar import qilish taqiqlandi. Bu haqda Al Arabiya xabar bermoqda.

Ta’kidlanishicha, agarda ushbu uch davlatdan mahsulotlar aniqlansa, ular musodara qilinadi.

Shuningdek, Al Arabiyada yozilishicha: Iqtisodiyotni qo‘llab-quvvatlash maqsadida yangi hukumat dollar operatsiyalariga ruxsat berganini e’lon qilgan va yagona bojxona to‘lovlarining yangi to‘plamini 50 foizdan 60 foizgacha pasaytirishni tasdiqlagan.

Qayd etilishicha, hukumatning bu qarori Suriyaga boshqa mamlakatlar, jumladan, AQShdan import oqimiga yo‘l ochgan.

Hozirgi kunda Damashqdagi do‘konlar “import qilinayotgan mahsulotlar bilan to‘lgan: turkcha shisha suv va Saudiya oziq-ovqat mahsulotlaridan tortib, Twix va Snickers kabi g‘arbiy shokoladlar, shuningdek, Pepsi va boshqa xalqaro brendlar ichimliklariga qadar”, – deyiladi xabarda.

Shuningdek, Suriyaning yangi hokimiyati qabul qilgan qaror mahalliy ishlab chiqaruvchilarni qo‘llab-quvvatlash uchun xomashyo importini yengillashtiradi va sanoatni rag‘batlantiradi.