Ichki ishlar vazirligi matbuot xizmatining xabardor.uz'ga malum qilishicha, joriy yil 30-may kuni soat 16:00 da Surxondaryo viloyati Sariosiyo tumani “Hamkorlik” mahallasi raisi Nurmamat Shoymardonovning yashash uyiga, ushbu mahalla yashovchisi 1976-yilda tug‘ilgan, muqaddam bir necha marotaba o‘g‘irlik va giyohvand moddalar bilan noqonuniy muomala qilish jinoyatlarini sodir etgani uchun sudlangan, giyohvand shaxs sifatida profilaktik nazoratga olingan A.I. mast holda bostirib kirib, maishiy muammolarini ro‘kach qilgan holda mahalla raisi va uyda bo‘lgan oila a’zolarining tinchligini buzib, janjal ko‘targan.

Chaqiruvga asosan voqea joyiga yetib kelgan mahalla profilaktika inspektori kapitan Gʻofur Berdiyev, tartibbuzar fuqaro voqea joyidan noma’lum tomonga qochib ketganligiga guvoh bo‘lgan.

Olib borilgan qidiruv tadbirlari natijasida, shu kuni soat taxminan 19.00 larda tartibbuzar A.I. o‘z uyiga qaytib kelganligi aniqlanib, u bilan profilaktik suhbat o‘tkazish hamda mahalla raisiga nisbatan sodir etgan huquqbuzarlik holatini rasmiylashtirish maqsadida tartibbuzarning xonadoniga borgan kapitan Berdiyev, xonadon egasining keskin qarshiligiga uchraydi.

Xonadon egasi bolta bilan profilaktika inspektoriga hujum qilib, uning chap qo‘l tirsagini yaralaganiga qaramasdan, jismoniy kuch ishlatilib, huquqbuzar zararsizlantirilgan.

Shundan so‘ng, kapitan Berdiyev xonadon qo‘shnilari va voqea joyiga yetib kelgan hamkasblari yordamida shifoxonaga yetkazilgan. Tibbiy ko‘rik natijasida chap tirsak pastki qismi suyaklarining ochiq singanligi va qon tomirlarini kesilishi oqibatida ko‘p qon yo‘qotganligi aniqlanib, tezkorlik bilan tegishli muolajalar ko‘rsatilgan.

Hozirda mazkur holat yuzasidan Sariosiyo tumani prokuraturasi tomonidan tegishli moddalar bilan jinoyat ishi qo‘zg‘atilib, gumonlanuvchi shaxs protsessual tartibda qamoqqa olingan.

Hayotini xavf ostiga qo‘yib jinoyatchini zararsizlantirgan profilaktika inspektori kapitan Gʻofur Berdiyevni rag‘batlantirish masalasi ko‘rilmoqda.

• IIV
• JK
• Surxondaryo