Surxondaryo viloyatida tegishli ruxsatnomasiz xususiy universitet tashkil etib, fuqarolardan pul undirib kelgan fuqarolar aniqlandi.

Mazkur holat Bosh prokuratura huzuridagi Departamentning Surxondaryo viloyat boshqarmasi tomonidan Taʼlim sifatini nazorat qilish davlat inspeksiyasining murojaatiga asosan o‘tkazilgan tergovga qadar tekshiruvda fosh qilingan.

Qayd etilishicha, fuqarolar M.J. va S.S. o‘zaro til biriktirib, “U.A.” MChJni tashkil etadi va Telegram messenjerida “At Termiziy University” xususiy universiteti kanalini ochib, faoliyat yuritishga tegishli ruxsatnoma olinmagan universitetga o‘qishga qabul boshlangani haqida xabarlar tarqatadi.

Dastlabki tergov-surishtiruv ishlarida ushbu universitetda o‘qish istagini bildirgan 73 nafar fuqaroning  306,9 mln so‘mini to‘lov pullari sifatida qabul qilib olganliklari aniqlangan.

Mazkur holat yuzasidan Jinoyat kodeksining 168-moddasi (firibgarlik) jinoyat ishi qo‘zg‘atilib, tergov harakatlari o‘tkazilmoqda.

• Firibgarlik
• Jinoyat
• Surxondaryo
• Universitet