Ma’lum qilinishicha, hozirda O‘zbekistonda 40 dan ziyod elektron to‘lov tashkilotlari faoliyat yuritmoqda. 1-noyabrdan esa tadbirkorlarga barcha mobil to‘lov ilovalarida ishlaydigan universal QR-kod beriladi. Bu orqali ular hisob-kitob jarayonlarini soddalashtirish imkoniyatiga ega bo‘ladi.

Shuningdek, kelgusi yil 1-yanvardan yillik aylanmasi 1 mlrd so‘mgacha bo‘lgan barcha tadbirkorlar uchun yagona tartib joriy etiladi: ular aylanmadan 1 foiz miqdorida soliq to‘laydi. Misol tariqasida, aylanmasi 100 million so‘mgacha bo‘lgan yakka tadbirkor hozirgi qat’iy soliq o‘rniga yillik ko‘pi bilan 1 million so‘m to‘laydi. Aylanmasi 100 milliondan 1 milliard so‘mgacha bo‘lgan tadbirkorlar esa avvalgiga nisbatan 3–4 barobar kam soliq to‘laydi.

“Umuman, yaratilayotgan sharoitlar orqali yakka tadbirkorlar hisobida yiliga 1 trillion so‘m, tasavvur qilyapsizlarmi, 1 trillion so‘m qolyapti. Bu – kichik biznes uchun qo‘shimcha resurs, yakka tadbirkorlar o‘z biznesini keyingi bosqichga olib chiqishi uchun yana bir imkoniyat”, — dedi Shavkat Mirziyoyev.

To‘qimachilik va eksportchi korxonalar uchun yangi dasturlar yo‘lga qo‘yilmoqda. O‘tgan hafta 200 dan ortiq to‘qimachilik korxonalari vakillari bilan uchrashuv o‘tkazilib, 7 trln so‘mlik qo‘llab-quvvatlash choralari belgilab olindi. Yaqin kunlarda sohada “ishonchli eksportchi” dasturi yo‘lga qo‘yiladi. Shuningdek, eksport oldi moliyalash tizimi tashkil etilib, uning uchun 200 mln dollar ajratiladi.

Mazkur tartib elektrotexnika, qurilish materiallari, oziq-ovqat va farmatsevtika kabi yuqori salohiyatga ega, ammo imkoniyatlari to‘liq ishlatilmagan tarmoqlarda ham joriy etiladi. Bu yo‘nalishdagi tadbirkorlar aylanma mablag‘ uchun 500 mln dollar bilan ta’minlanadi.

Prezidentning ta’kidlashicha, har bir tarmoqning 10 tadan eng raqobatdosh va sifatli mahsulotiga maxsus “O‘zbekiston ramzi” belgisi beriladi. Ushbu mahsulotlarni xalqaro bozorlarda targ‘ib qilish uchun keng ko‘lamli reklama kampaniyasi tashkil etiladi.

Poytaxt va viloyat markazlaridagi korxonalarini mehnat resursi va bo‘sh yer ko‘p tumanlarga ko‘chirmoqchi bo‘lgan tekstil tadbirkorlariga 10 milliard so‘mgacha imtiyozli kredit beriladi. Prezident boshqa sohalardagi korxonalar ham bunday tashabbus bilan chiqsa, ular qo‘llab-quvvatlanishini ta’kidladi.

Arzon xomashyo bilan ta’minlash maqsadida aralash mato va gazlamalar 2028-yil 1-yanvarga qadar bojxona bojidan ozod etildi. Biroq shunday muammolar sanoatning boshqa tarmoqlarida ham mavjudligi qayd etildi. Jahon banki ekspertlari ham tarif siyosati ishlab chiqarishni rag‘batlantirishi lozimligini bildirdi.

Ochiq muloqotga tayyorgarlik jarayonida tadbirkorlardan tariflar va xomashyo masalasi bo‘yicha 130 ta murojaat kelib tushgan. Shu munosabat bilan Prezident Bosh vazirning iqtisodiyot va investitsiyaga mas’ul o‘rinbosarlariga 1-noyabrga qadar har bir tarmoq va hududiy korxonalar ehtiyojini o‘rganib, tariflarni qayta ko‘rib chiqish vazifasini topshirdi.

Shuningdek, import jarayonida tadbirkorlarga yengillik yaratish maqsadida muvofiqlik sertifikatlari endilikda har bir partiyaga emas, shartnomada ko‘rsatilgan umumiy hajm uchun beriladi.

• Prezident
• Soliq
• Tadbirkorlik
• muloqot