AQSHning Nyu-York shahrida O‘zbekiston va Niderlandiya terma jamoalari o‘rtasidagi o‘rtoqlik uchrashuvi oldidan o‘zbekistonlik futbolchilar va murabbiylarning qat’iy xavfsizlik tekshiruvidan o‘tkazilgani yuzasidan O‘zbekiston Tashqi ishlar vazirligi munosabat bildirdi.

Vazirlik ma’lumotiga ko‘ra, Nyu-Yorkdagi Bosh konsulxona orqali AQSHning tegishli idoralari bilan aloqa o‘rnatilib, yuzaga kelgan holat bo‘yicha rasmiy tushuntirish so‘ralgan.

TIV vakili Omonulla Fayziyevning ta’kidlashicha, davlatlarning xavfsizlik choralarini o‘z ichki qoidalari asosida amalga oshirish huquqi hurmat qilinadi. Shu bilan birga, bunday jarayonlar sport musobaqalarining o‘zaro hurmat va do‘stona munosabatlarga asoslangan ruhiga salbiy ta’sir ko‘rsatmasligi muhimligi qayd etilgan

Avvalroq ijtimoiy tarmoqlarda uchrashuv oldidan O‘zbekiston terma jamoasi a’zolari qo‘l metallodetektorlari yordamida tekshirilgani aks etgan videolar tarqalgan edi. Xavfsizlik xodimlari futbolchilar va murabbiylardan sumkalari hamda sport anjomlarini yerga qo‘yishni so‘ragan, hududda xizmat iti bilan kinolog va boshqa xavfsizlik xodimlari ham bo‘lgan.

O‘zbekiston milliy terma jamoasi bosh murabbiyi Fabio Kannavaro mazkur tekshiruvlarni odatiy xavfsizlik amaliyoti sifatida baholagan. O‘zbekiston futbol assotsiatsiyasi esa bunday tartib xavfsizlik talablari bilan bog‘liq bo‘lishi mumkinligini bildirgan.

Hozircha AQSH tomoni ushbu holat yuzasidan rasmiy izoh bermagan.