Toshkent shahar IIBB bergan ma’lumotga ko‘ra, “Davlat tomonidan tartibga solinadigan sohalarga xususiy sektorni jalb etish bo‘yicha qo‘shimcha chora-tadbirlar to‘g‘risida”gi Prezident qarori bilan avtomototransport vositalari va shahar elektr transporti vositalari haydovchilarini tayyorlash, qayta tayyorlash va ularning malakasini oshirish bo‘yicha nodavlat ta’lim xizmatlari ko‘rsatish faoliyati uchun litsenziyaga ega tadbirkorlik subyektlariga barcha toifadagi avtomototransport vositalarini (trolleybus va tramvaydan tashqari) boshqarish huquqini beruvchi haydovchilik guvohnomasini olish uchun nazariy va amaliy imtihonlarni o‘tkazish huquqi berilgan.

Shuningdek, Hukumatning 272-sonli “Avtomototransport vositalarini boshqarish huquqini beruvchi haydovchilik guvohnomalarini olish uchun imtihonlarni o‘tkazish sohasiga xususiy sektorni jalb etishga doir qo‘shimcha chora-tadbirlar to‘g‘risida”gi qarori tasdiqlangan.

Ushbu qarorlarga muvofiq Toshkent shahar Sirg‘ali tumanida “Toshkent imtihon markazi” barpo etilgan. Ushbu markaz joriy yilning 4-fevral kunidan o‘z faoliyatini boshlaydi.

“Toshkent imtihon markazi” o‘z faoliyatini boshlaganligi munosabati bilan Vazirlar Mahkamasining qaroriga asosan joriy yilning 4-fevralidan Toshkent shahar IIBB YHXB Ro‘yxatlash va imtihon olish bo‘lim-bo‘linmalari haydovchilik guvohnomasini berish uchun nazariy va amaliy imtihonlarni qabul qilish faoliyatini to‘xtatadi.

Shunga muvofiq endilikda fuqarolar tomonidan Toshkent shahrida haydovchilik guvohnomasini olish yoki uni tiklash uchun imtihonlarni topshirish Sirg‘ali tumanida joylashagan “Toshkent imtihon markazi” tomonidan amalga oshirilishi ma’lum qilindi.

• Toshkent
• YHXBB
• xabar