Kaktus media nashrining xabar berishicha, Qirg‘iziston Milliy xavfsizlik davlat qo‘mitasi rahbari Qamchibek Tashiyev ayollarni ko‘proq farzand ko‘rishga chaqirgan.

Tashiyevning so‘zlariga ko‘ra, ko‘p bolali oilalar mamlakat kelajagi uchun asosdir. Shu sababli qirg‘izistonlik ayollar besh-o‘n nafar bolani dunyoga keltirishi kerak.

“Biz ko‘p farzandli bo‘lishimiz lozim. Ayollar, yosh kelinlar bunga alohida e’tibor qaratishi kerak. Faqat shundagina Qirg‘iziston taraqqiy etishi mumkin. Davlat xavfsizligini mustahkamlash bevosita aholi soni bilan bog‘liq. Agar aholi ko‘paymasa, xavfsizlikni ta’minlash murakkab vazifaga aylanadi. Hozirgi kunda dunyoda ulkan o‘zgarishlar sodir bo‘lmoqda va qo‘shni davlatlar aholi soni jihatidan bizdan o‘zib ketmoqda. Biz bu masalaga jiddiy yondashishimiz shart”, – deb ta’kidlagan Tashiyev.

Shuningdek, u davlat tug‘ilish darajasini oshirish uchun zarur sharoitlar yaratishga tayyorligini aytgan. Bular qatoriga bog‘cha, maktab va boshqa ijtimoiy obyektlar qurilishini kiritgan.

Bundan tashqari, Tashiyev baland tog‘li hududlar aholisi uchun onalik kapitalini joriy etish bo‘yicha hukumat rejasini ma’lum qilgan.

Unga ko‘ra, mamlakatning ayrim viloyatlarida to‘rtinchi farzand uchun 100 ming som, beshinchisi uchun 600 ming som, yettinchisi uchun esa bir million som to‘lanishi ko‘zda tutilgan.

• Qirg‘iziston