Toshkent viloyatida bir oilaning 5 nafar a’zosini o‘ldirgan qotilga nisbatan umrbod ozodlikdan mahrum qilish jazosi tayinlandi.

Bu haqda Oliy sud matbuot kotibi Aziz Obidov xabar berdi.

Xabarga ko‘ra, bugun, 28-noyabr kuni Toshkent viloyat sudida Z.S.ga (erkak, 1995-yilda Namangan viloyatida tug‘ilgan) oid jinoyat ishini birinchi instansiyasida ko‘rib chiqish bo‘yicha sud jarayoni yakunlanib, sud hukmi e’lon qilingan.

Ushbu jinoyat ishi yopiq sud majlisida ko‘rib chiqilgan.

Sud hukmiga muvofiq Z.S. Jinoyat kodeksining 97-moddasi (Qasddan odam o‘ldirish) 2-qismi “a”, “v”, “j”, “z”, “i” bandlari, 118-moddasi (Nomusga tegish) 1-qismi, 134-moddasi (Qabrni tahqirlash), 164-moddasi (Bosqinchilik) 3-qismi “v”, “g” bandlari va 173-moddasi (Mulkni qasddan nobud qilish yoki unga zarar yetkazish) 2-qismi “b” bandida nazarda tutilgan jinoyatlarni sodir etganlikda aybli deb topilib, unga JKning 59-moddasi muvofiq umrbod ozodlikdan mahrum qilish jazosi tayinlangan. Jazoni maxsus tartibli koloniyalarda o‘tash belgilangan.

“Birinchi instansiya sudining hukmi ustidan taraflar qonunda belgilangan tartib va muddatda Toshkent viloyat sudining jinoyat ishlari bo‘yicha sudlov hay’atiga apellyatsiya yoki kassatsiya tartibida shikoyat berish va protest keltirishga haqliligi ma’lum qilinadi”, – deyilgan xabarda.

Avvalroq, sud jarayoni boshlanganligi haqida xabar bergan edi.

• Qotillik
• Toshkent viloyati