Ijtimoiy tarmoqlarda Toshkent shahar Yunusobod tumani Markaz-5 da joylashgan 21-sonli Mehribonlik uyida tarbiyalanuvchilar tomonidan miting uyushtirilgani aks etgan videolar tarqaldi. Mazkur holatga Xalq ta’limi vazirligi munosabat bildirdi.

Aniqlanishicha, tarbiyalanuvchilar mazkur tarbiya muassasasi hamshirasi Z.K.ni Mehribonlik uyi binosiga kirishiga qarshilik ko‘rsatmoqchi bo‘lishgan. Muassasaga huquqni muhofaza qiluvchi organlar vakillari zudlik bilan yetib kelgan hamda vaziyatni yumshatishgan.

Shuningdek, ushbu muassasaga Vazirlar Mahkamasining mutasaddilari, Bolalar bo‘yicha ombudsman, Xalq ta’limi vazirligi rahbariyati, Toshkent shahar hokimi, Milliy gvardiya, shahar prokuraturasi va tegishli mutassadilar muassasaga kelgan holda vaziyatni o‘rgandilar.

Voqea sababi o‘rganilganda muassasa tarbiyalanuvchilari tomonidan xodimlardan biriga nisbatan e’tiroz kayfiyati shakllangani aniqlandi.

Ayni paytda muhit barqaror, Mehribonlik uyi tarbiyalanuvchilari kun tartibi bo‘yicha shug‘ullanmoqdalar, vaziyat nazoratga olingan, deyiladi vazirlik xabarida.

• Mehribonlik_uyi
• Namoyish
• Toshkent
• Xalq ta'limi vazirligi