Kecha, 12-oktyabr kuni Oliy va oʻrta maxsus taʼlim vaziri Abduqodir Toshqulov oliy taʼlim muassasalarida oʻquv jarayonini kredit-modul tizimi asosida tashkil qilishni takomillashtirish boʻyicha ishchi guruh, oʻquv ishlari boʻyicha prorektor va tegishli masʼullar ishtirokida videoselektor yigʻilishi oʻtkazdi.

Qayd etilishicha, vazir dastlab soʻnggi vaqtlarda ijtimoiy tarmoqlar orqali haligacha ayrim oliy taʼlim muassasalarida oʻqishini koʻchirish bilan bogʻliq masalalar koʻtarilayotgani, bunda talabalar va yaqinlarining eʼtirozlari keng jamoatchilik muhokamasiga sabab boʻlayotganini tanqid qilgan.

“Oʻzbekiston-Finlyandiya pedagogika instituti yuzasidan eʼlon qilingan murojaatga munosabat bildirilib, u yerda maʼnaviy muhit talab darajasida emasligi, guruhbozlik kabi illat ildiz otib, bu oʻz navbatida talabalar taʼlim olishiga ham taʼsir koʻrsatayotganini keskin qoraladi. Vazir shu joyning oʻzidayoq xizmat vazifasiga masʼuliyat bilan yondashmaganligi, muassasada taʼlim jarayoni va ijtimoiy muhitni toʻgʻri tashkil etmaganligi uchun institut rahbarini vazifasidan ozod etish boʻyicha masʼullarga topshiriq berildi”, – deyiladi xabarda.

Bundan tashqari, ayrim universitetlarda hali ham urugʻ-aymoqchilik, qarindoshchilik holatlari saqlanib qolayotgani, talabalar taqdiriga loqayd, yoshlar tarbiyasiga masʼuliyatsiz rahbarlar uchrayotgani tilga olingan.

Shundan soʻng, talabalar bilimini nazorat qilish va baholash tizimi, uning oʻrtacha qiymatini hisoblash mavzusida taqdimot namoyish etilib, kredit-modul hamda oliy taʼlim jarayonlarini boshqarish axborot tizimida kuzatilayotgan kamchiliklar muhokama qilingan.

Shuningdek, haligacha ayrim professor-oʻqituvchilar eskicha metod asosida talabalarga taʼlim berayotgani, ularning yangi tizimga moslasha olmayotgani ham taʼlim sifatiga taʼsir koʻrsatayotgani qayd etilib, ular uchun talabaning mustaqil taʼlim olishga oʻrgatish, baholash tizimi borasidagi kompetensiyalarini oshirish boʻyicha seminar-treninglar tashkil etish vazifasi berilgan.

“Hududlardagi oliy taʼlim muassasalariga borganimda axborot-resurs markazlariga alohida eʼtibor qarataman, shunda koʻplab talabalar qoʻlida asosan badiiy adabiyotlarni koʻraman. Aslida talaba oʻz mutaxassisligi boʻyicha zarur manbalarni oʻqishi kerak. Afsuski, ular kerakli o‘quv qo‘llanmalar yoʻqligidan boshqa adabiyot oʻqishga majbur boʻlmoqda”, – dedi vazir.

Bunga sabab sifatida oliy taʼlim muassasasi zarur oʻquv adabiyotlarni tender asosida xarid qilishi, lekin tenderdagi adabiyotlar ichida u izlagan qoʻllanmalar yoʻqligi taʼkidlangan.

Yuqoridagilardan kelib chiqib, masʼullarga ikki hafta muddatda oʻquv jarayonlarining barcha jabhalarini puxta oʻrgangan holda tahliliy maʼlumot kiritish yuzasidan koʻrsatma berilgan.

• OTM
• Toshqulov
• Universitet
• Vazirlik