AQShning amaldagi prezidenti Truth Social ijtimoiy tarmog‘idagi sahifasida avtopero (avtomatik imzo qo‘yuvchi qurilma) yordamida imzolangan barcha farmonlar va boshqa hujjatlarni bekor qilishga qaror qilganini bildirdi.

“Uyquchi Jo Bayden avtopero yordamida imzolagan har qanday hujjat bekor qilinadi va o‘z kuchini yo‘qotadi, bu barcha hujjatlarning taxminan 92 foizi degani. Avtopero AQSh prezidentining maxsus ruxsatisiz ishlatilishi mumkin emas”, — deb yozdi Tramp.

Avtopero Jo Baydenning prezidentlik muddati oxirida afv etish va jazoni yengillashtirish hujjatlarini imzolash jarayonida qo‘llangan edi. Afv etilganlar orasida sobiq prezidentning o‘g‘li Hanter Bayden ham bo‘lgan.

Jo Baydenning aytishicha, u barcha qarorlarni shaxsan o‘zi og‘zaki tarzda tasdiqlagan, yordamchilari esa avtoperodan foydalangan, chunki gap “juda ko‘p odamlarning taqdiri” haqida ketgan.

Donald Tramp avval ham Baydenning afv etish to‘g‘risidagi qarorlari haqiqiy emasligini, chunki ular sobiq prezidentning xabarisiz avtopero bilan imzolanganini da’vo qilgan edi. Bayden esa buni rad etgan.

• AQSh
• Bayden
• Tramp