Ukraina ATACMS bilan Kursk-Vostochniy aerodromi va S-400 zenit-raketa divizioniga zarba bergan, buni Rossiya Mudofaa vazirligi tasdiqladi.

ATACMS uzoq masofali ballistik raketasi Kurskdan 7 kilometrlik masofada joylashgan Kursk-Vostochniy aerodromiga kelib urilgan. Bu haqda Rossiya Mudofaa vazirligi 26-noyabr kuni e’lon qilingan bayonotida ma’lum qildi. Ukraina 3 kun ichida uzoq masofali raketalar bilan Kursk oblastiga ikki marotaba zarba bergan.

25-noyabr kuni Kursk-Vostochniy aerodromiga sakkizta ATACMS raketalari tomonidan zarba berilgan, shulardan yettitasi havo mudofaa tizimi tomonidan urib tushirilgan bo‘lsa, bittasi nishonga teggan.

Avvalroq, 23-noyabr kuni Ukraina Qurolli kuchlari Kurskdan 37 km shimoli-g‘arbda joylashgan Lotarevka hududiga beshta ATACMS raketasi bilan zarba bergan. Shulardan ikkitasi nishonlarga yetgan, radar stansiyasi shikastlangan, xodimlar orasida qurbonlar borligi aytilgan edi.

“Javob choralari tayyorlanmoqda”, – deya ma’lum qilgan Rossiya Mudofaa vazirligi.

• Rossiya
• Ukraina