Ukraina Oliy Radasi (parlament) prezident Volodimir Zelenskiy tomonidan kiritilgan Rossiyaning barcha moliya institutlari, jumladan, Markaziy bankiga nisbatan 50 yil muddatga cheklov choralari to‘g‘risidagi qarorni ma’qulladi. Bu haqda Rada deputati Yaroslav Jeleznyak ma’lum qildi.

“Parlament prezidentning Rossiya Federatsiyasi moliya institutlariga nisbatan iqtisodiy sanksiyalar qo‘llash to‘g‘risidagi farmonini qo‘llab-quvvatladi”, – deya yozdi Jeleznyak o‘z Telegram kanalida.

Jeleznyakning so‘zlariga ko‘ra, cheklovlar Rossiyada ro‘yxatdan o‘tgan barcha banklarga, shuningdek, nobank kredit tashkilotlariga, to‘lov tizimlari operatorlariga, fond bozori professional ishtirokchilariga, sug‘urta kompaniyalariga, investitsiya fondlariga va moliya sektorining boshqa korxonalariga taalluqli.

Qayd etish mumkin, Ukraina parlamenti saytida mamlakat Milliy xavfsizlik kengashining ushbu cheklovlarni joriy etish to‘g‘risidagi qarorini ma’qullovchi rezolyutsiya loyihasi paydo bo‘ldi. Ular Rossiya Federatsiyasi moliya institutlariga tegishli bo‘lgan aktivlar bilan operatsiyalarni to‘xtatib turish, ular bilan biznes aloqalarini o‘rnatish va bitimlarni taqiqlashni nazarda tutadi.

• Bank
• Parlament
• Rossiya
• Ukraina