Ukraina Xavfsizlik xizmati (UXX) Xerson vokzalining sobiq rahbari Rossiya bilan hamkorlikda gumon qilinib, hibsga olinganini maʼlum qildi.

“UXX Rossiya kuchlariga harbiy poyezdlarni Ukraina hududiga olib o‘tishda yordam bergan sobiq “Xerson temir yo‘l vokzalining boshlig‘ini” qo‘lga oldi. To‘plangan dalillarga asoslanib, xavfsizlik xizmati tergovchilari jinoyatchiga "tajovuzkor davlat bilan sheriklik" ayblovini qo‘yishgan”, – deyiladi departamentning Telegram-kanalida.

Xavfsizlik хizmati hibsga olingan shaxsning ismini oshkor qilmadi.

Qayd etilishicha, avvalroq u Xerson temir yo‘li unitar korxonasi tarkibiga kiruvchi shahar vokzalining stansiyasi boshlig‘i lavozimiga tayinlangan. Boshqarma maʼlumotlariga koʻra, gumonlanuvchi oʻz lavozimining vakolatlari orqali “Rossiya hududidan harbiy texnika, qurol va oʻq-dorilarni toʻsiqsiz olib oʻtishga” hissa qoʻshgan.

Hozirda ushbu holat bo‘yicha qamoqqa olish tarzidagi ehtiyot chorasini qo‘llash masalasi hal qilinmoqda. Agar erkak rostan ham ushbu ishlarda aybli deb topilsa, barcha mol-mulki musodara qilinib, 15 yilgacha ozodlikdan mahrum etilishi mumkin.

Ma’lumot uchun, Xerson viloyati 2022-yil sentabr oyida boʻlib oʻtgan referendum natijasida Rossiya Federatsiyasining taʼsis subyektiga aylandi. Shu bilan birga, Ukraina tomoni uning qonuniyligini tan olmaydi va mintaqa hududini o‘qqa tutishda davom etmoqda. Xerson viloyatining o‘ng qirg‘oq qismi, jumladan, Xerson shahri noyabr oyidan beri Ukraina kuchlari nazoratida.

• Rossiya
• Ukraina